काठमाडौं– प्रतिनिधि सभामा सांसदहरूको उपस्थिति नपुगेको विषय चर्चामा आइरहेका बेला राष्ट्रिय स्वतन्त्र पार्टी (रास्वपा) आबद्ध सांसद आशिका तामाङले सांसदहरू मन्त्रालय धाउनुपर्ने बाध्यताका कारण सदनमा उपस्थिति न्यून हुने गरेको तर्क गरेकी छन्।
मंगलबार सांसदहरूको कोरम नपुगेपछि प्रतिनिधि सभा बैठक स्थगित भएको थियो।
यही प्रसंगमा तामाङले फेसबुकमा पोस्ट गर्दै सांसदको मुख्य जिम्मेवारी सदनमा उपस्थित भएर जनताका विषय उठाउनु भए पनि निर्वाचन क्षेत्रका जनताका गुनासा र समस्या समाधानका लागि सांसदहरू दिनहुँजसो सम्बन्धित मन्त्रालय र सरकारी कार्यालय धाउनुपर्ने अवस्था रहेको बताएकी छन्।
‘सांसदहरू सबै मन्त्रालयको ढोकामा मन्त्री र सचिवलाई भेट्ने अनि गुनासो पोख्न लाइनमा हुनुहुन्छ, अनि पुग्छ त संख्या?’ उनले प्रतिप्रश्न गरेकी छन्।
सरकार फेरिए पनि प्रधानमन्त्री नयाँ आए पनि सरकारी कामको कार्यान्वयन गर्ने कर्मचारी र मन्त्रालयका सचिवहरू नै भएकाले सांसदहरूले आफ्ना क्षेत्रका कामका लागि उनीहरूलाई निरन्तर पछ्याउनुपर्ने उनको भनाइ छ।
तामाङले तीन दिनमा हुने अपेक्षा गरेको काम तीन महिनासम्म नभएपछि दिनमा पटक–पटक मन्त्रालय धाउनुपर्ने अवस्था रहेको बताएकी छन्।
जनताको गुनासो सबैभन्दा पहिले निर्वाचित क्षेत्रका सांसदसमक्ष आउने गरेको भन्दै उनले ती गुनासा लिएर सम्बन्धित कार्यालय वा मन्त्रालयमा सम्पर्क गर्दा कहिले सम्बन्धित व्यक्ति ‘अफिसमा नभएको’ र कहिले ‘व्यस्त रहेको’ जवाफ आउने गरेको गुनासो गरेकी छन्।
फोनबाट काम नभएपछि मन्त्रीलाई भेट्न मन्त्रालय नै पुग्नुपर्ने र त्यहाँ पनि मन्त्री अर्को बैठकमा व्यस्त रहेको भन्दै प्रतीक्षालयमा कुर्नुपर्ने अवस्था रहेको तामाङको भनाइ छ।
‘एउटा मन्त्रालयमा बल्लतल्ल गुनासो त सकियो, अर्को शिक्षा, स्वास्थ्य, कानुन, भौतिक पूर्वाधारलगायतका गुनासा लिएर सम्बन्धित मन्त्रालय जान अझै बाँकी नै हुन्छ,’ उनले भनेकी छन्।
मन्त्रालय धाउँदा दिन बित्ने अवस्थाप्रति व्यंग्य गर्दै तामाङले साँझ ५ बजिसक्दा अँध्यारो हुन थाल्ने र आफ्ना छोराछोरीलाई स्कुलबाट ल्याउने समयसमेत सम्झिनुपर्ने अवस्था हुने बताएकी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786437116.jpg)
-1786513116.png)
