काठमाडौं– प्रमुख प्रतिपक्षी दल नेपाली कांग्रेसले प्रधानमन्त्री कुम्भकर्ण निन्द्रामा रहेको भनेर प्रश्न गरेको छ ।
प्रतिनिधिसभाको मंगलबारको बैठकमा कांग्रेस सांसद भरतबहादुर स्वारले सीमा विवाददेखि प्रशासनिक ढिलासुस्ती र भ्रष्टाचारका विषयमा सरकारको ध्यानाकर्षण गराएका हुन् ।
सांसद स्वारले भारतले नेपालको भूमि मिचेको विषयमा सरकार मौन रहेको भन्दै आलोचना गरे । लिम्पियाधुरा, कालापानी र सुस्तालगायतका नेपाली भूभाग भारतले मिचिरहेको अवस्थामा प्रधानमन्त्रीले ठोस कदम चाल्न नसकेको उनको आरोप थियो । ‘आफ्नो कार्यकक्षमा अखण्ड नेपालको नक्सा राख्ने प्रधानमन्त्रीले अहिले चुच्चे नक्सा मेटाएर १०० को नोटमा छाप्न किन बाध्यकारी अवस्था आयो ?’ उनले प्रश्न गरे ।
विद्युत् महसुल, राहदानी, सवारी चालक अनुमति पत्र र मालपोतका काममा सर्वसाधारणले भोग्नुपरेको सास्तीबारे उनले सरकारलाई सचेत गराए । ‘मालपोतको सानो जग्गा फुकुवा गर्न ६ महिना लाग्दासमेत काम हुँदैन, यसको भुक्तभोगी म आफैँ हुँ,’ उनले भने ।
अनलाइन सेवाको कुरा गरे पनि व्यवहारमा जनताले दुःख मात्रै पाएको उनले बताए । सांसद स्वारले आफूले सुदूरपश्चिम र अछामका विकास निर्माणका समस्या राख्न चैत २१ गतेदेखि प्रधानमन्त्रीसँग समय मागे पनि भेट नपाएको गुनासो गरे । ‘तपाईं कुन कुम्भकर्णको निद्रामा हुनुहुन्छ प्रधानमन्त्रीज्यू ? यो समग्र सुदूरपश्चिम र अछामका जनतामाथि गरिएको अपमान हो,’ उनले भने । उनले प्रधानमन्त्रीलाई सुदूरपश्चिमका जनतालाई देखावटी माया नगर्न समेत आग्रह गरे ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791645793.png)
-1786602170.png)
