काठमाडौं– नेपाली कांग्रेसका नेता डा.शशांक कोइरालाले पार्टीभित्र एकता कायम गर्दै आगामी अधिवेशन सफल बनाउन सबैको सहयोग आवश्यक रहेको बताएका छन्।
सोमबार नेपाली कांग्रेस सिन्धु–काठमाडौं सम्पर्क समितिले आयोजना गरेको युवा भेलालाई सम्बोधन गर्दै कोइरालाले बीपी कोइराला र कृष्णप्रसाद कोइरालाले लामो संघर्ष गरेर नेपाली जनताको अधिकार र स्वतन्त्रताका लागि योगदान गरेको स्मरण गरे।
उनले नेपाली कांग्रेसले इतिहासमा महत्वपूर्ण काम गरेको उल्लेख गर्दै पार्टीभित्र कसैलाई गाली गरेर आफ्नो पक्ष बलियो नहुने बताए।
‘अरुलाई कुरूप हेरेर आफू सुन्दर हुँदैन । हामी गगन थापालाई किन गाली गर्छौं? गाली गर्नै पर्दैन,’ उनले भने, ‘गाली गर्यो भने झन् उसलाई महत्त्व दिएको हुन्छ । त्यसैले किन गाली गर्नुहुन्छ? केही भन्दै नभन्नुस्, त्यो नै सबैभन्दा ठूलो अपमान हो,’ उनले भने ।
कोइरालाले आफूलाई पार्टीले संयोजकको जिम्मेवारी दिएपछि अप्ठ्यारो अवस्थामा उभिएको उल्लेख गर्दै सबैलाई समेटेर पार्टी एकताबद्ध गर्नु आफ्नो प्राथमिकता रहेको बताए।
‘म एक्लो मान्छे हुँ तर म के चाहन्छु भने सबैलाई समावेश गरेर पार्टीलाई एक गर्ने मेरो प्राथमिकता हो,’ उनले भने, ‘म एक्लैले केही गर्न सक्दिनँ । तपाईंहरूको सहयोग भयो भने, हातमा हात मिलायो भने धेरै बलियो हुन्छ,’ उनले भने ।
उनले संघर्षबाट नेपाली कांग्रेस निखारिएर आएको भन्दै पार्टीको भविष्य युवाको हातमा रहेको बताए। ‘आजका युवाहरूले यो पुष्टि गर्छन् कि भोलिको नेपाली कांग्रेस बलियो हुन्छ,’ उनले भने।
नेपाली कांग्रेस नयाँ चरणको संघर्षमा प्रवेश गरेको छ : सिटौला
यस्तै अर्का नेता कृष्णप्रसाद सिटौलाले कांग्रेस नयाँ चरणको संघर्षमा प्रवेश गरेको बताएका छन्।
सिटौलाले पछिल्लो घटनाक्रमले पार्टीलाई नयाँ चरणको संघर्षमा प्रवेश गराएको बताए। उनले कार्यकर्तालाई धैर्यताका साथ अघि बढ्न आग्रह गर्दै आफूहरू साथमा रहेको बताए।
उनले भने, ‘के नेपाली कांग्रेस फेरि एउटा नयाँ चरणमा प्रवेश गर्दैछ? संघर्षको एउटा नयाँ चरणमा प्रवेश गर्दैछ भन्ने बोध भएको छ । तपाईंहरू निरन्तर अगाडि बढ्नुस्, हामी साथमा छौं।’
उनले नेपाली कांग्रेसको इतिहासमै नभएको विशेष घटनामा रुमलिएको दाबी गरे। उनले सिंहदरबार, सर्वोच्च अदालत, राष्ट्रपति भवन र संसद् भवनमा आगजनी, तोडफोड तथा साङ्घातिक हमला हुनु गम्भीर विषय भएको बताए ।
‘नेपाली कांग्रेसको इतिहासमा कहिले पनि यस्तो घटना घटेको छैन । विशेष महाधिवेशनको नाममा केन्द्रीय कार्यसमितिलाई विघटन इतिहासकै नौलो भयो । साथै नेपालमा कहिले पनि सिंहदरबारमा, सर्वोच्च अदालतमा, राष्ट्रपति भवनमा, संसद् भवनमा आगो लागेको थिएन,’ उनले भने ।
उनले कांग्रेसका सभापति तथा कार्यकर्तामाथि समेत तोडफोड, आगजनी, लुटपाट र साङ्घातिक हमला भएको भन्दै यस्तो घटना विगतका कुनै पनि संघर्षका क्रममा नभएको बताए।
सिटौलाले विशेष महाधिवेशनपछि निर्वाचन आयोगले गरेको निर्णयप्रति पनि असन्तुष्टि जनाए। उक्त निर्णय कांग्रेसको विधान, निर्वाचनसम्बन्धी कानुन तथा संविधानविपरीत रहेको उनको दाबी थियो।
सर्वोच्च अदालतले निर्वाचन आयोगको निर्णयमाथि पुनरावलोकनका लागि बाटो खोलेको भन्दै उनले कांग्रेसले न्याय पाउनेमा आफूहरू पूर्ण आशावादी रहेको बताए।
सभापति शेरबहादुर देउवामाथि भएको साङ्घातिक हमलाको विषयमा पनि सिटौलाले आपत्ति जनाए । देउवा अस्पतालमा रहेको अवस्थामा पार्टीकै महामन्त्रीबाट उनलाई हटाउनुपर्ने अभिव्यक्ति आउनु आफूले बुझ्न नसकेको उनले बताए।
उनले कांग्रेसलाई एकताबद्ध बनाएर लोकतान्त्रिक मूल्य र मान्यताको संरक्षण गर्दै अघि बढ्न सबै नेता तथा कार्यकर्तालाई आग्रह गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
