काठमाडौं– राष्ट्रिय स्वतन्त्र पार्टी (रास्वपा) का सभापति रवि लामिछानेनिकट सांसद दीपक बोहोराका पछिल्ला सामाजिक सञ्जाल पोस्टले प्रधानमन्त्री बालेन्द्र शाह र सरकारप्रति उनको असन्तुष्टि संकेत गरिरहेको देखिएको छ ।
बोहोराले शनिबार सामाजिक सञ्जालमा कालो चस्मा खोलेको तस्बिर राख्दै ‘मैले त कालो चस्मा खोलेँ है’ भन्दै पोस्ट गरे । प्रतिनिधिसभामा प्रधानमन्त्री शाहले लगाउने कालो चस्माको विषयमा चर्चा भइरहेका बेला बोहोराको उक्त पोस्ट आएको हो ।
सदनमा सांसदहरुको ड्रेस कोड र चस्माको विषय उठेपछि बोहोराले त्यसैलाई संकेत गर्दै यस्तो पोस्ट गरेको देखिन्छ । उनी रास्वपा सभापति रवि लामिछानेनिकट सांसदका रूपमा चिनिन्छन् ।
बोहोराले आइतबार साँझ फेरि अर्को पोस्ट गरेका छन् । भिडियोसहित उनले ‘साँझ सात बजेतिर बत्ती गएपछिको अँध्यारो सहर !’ भन्दै लेखेका छन् ।
उनको यो पोस्टलाई भने नयाँ सरकार गठनपछि विद्युत् आपूर्तिमा देखिएको समस्याप्रति सरकारको ध्यानाकर्षण गराउने संकेतका रूपमा हेरिएको छ । बेला–बेलामा बत्ती जाने तर सरकारले त्यसमा सुधार गर्न नसकेको सन्देश दिन खोजेको देखिन्छ ।
चस्मादेखि बत्तीको अँध्यारोसम्म
प्रतिनिधिसभाको बुधबारको बैठकमा सांसदहरूले प्रधानमन्त्री शाहले लगाउने कालो चस्मालाई लिएर टिप्पणी गरेका थिए । नेकपाका सचेतक युवराज दुलालले ड्रेस कोटसँग कालो चस्मा अशोभनीय देखिएको टिप्पणी गरेका थिए ।
सभामुख डोलप्रसाद अर्यालले समेत चिकित्सकले सिफारिस गरेको चस्मामा मात्र दलहरू सहमत भएको हो कि भन्दै प्रश्न गरेका थिए ।
कांग्रेस सांसद वासना थापाले भने चस्माको विषयमा विपक्षीलाई आपत्ति नरहेको बताउँदै प्रधानमन्त्री शाह, गृहमन्त्री सुधन गुरुङ र पूर्वाधारमन्त्री सुनील लम्साललगायतमा कालो चस्माको मोह देखिएको टिप्पणी गरेकी थिइन् ।
रास्वपा सचेतक क्रान्तिशिखा धितालले भने हरेक विषयमा नियमन गर्न नहुने धारणा राखेकी थिइन् । कार्यव्यवस्थामा भने चिकित्सकले सिफारिस गरेबाहेकको चस्मा लगाउन नपाइने सहमति भएको बताइएको छ ।
यहीबीच रास्वपाभित्र प्रधानमन्त्री शाहसँग असन्तुष्ट सांसदहरूले सरकारका कामकारबाहीप्रति प्रश्न उठाउन थालेका छन् । बोहोराका पछिल्ला दुई पोस्टलाई पनि यही पृष्ठभूमिमा अर्थपूर्ण रूपमा हेरिएको छ ।
कालो चस्मा खोलेको संकेतदेखि ‘अँध्यारो सहर’को पोस्टसम्म आइपुग्दा बोहोराले प्रत्यक्ष रूपमा सरकारको आलोचना नगरे पनि उनका अभिव्यक्तिले प्रधानमन्त्री शाहप्रति असन्तुष्टि बढ्दै गएको संकेत गरेका छन् ।
सदनमा सरकारविरुद्ध पार्टीकै सांसदहरुले असन्तुष्टि व्यक्त गर्न थालेपछि प्रधानमन्त्री शाहले शुक्रबार राति आफू एक्लिएको संकेत गर्दै स्टाटस लेखेका थिए । ‘केही समय लाग्छ, सही समय आउनलाई। ढिला होला, तर गलत हुँदैन। नआत्तिनुहोस्। सुनेको र देखेकोभन्दा वास्तविकता कहिलेकाहीँ फरक हुन सक्छ। कहिलेकाहीँ एक्लै लड्नुपर्छ। यो पहिलो चोटि होइन’ प्रधानमन्त्रीले लेखेका थिए ।
भोलिपल्ट त्यसैको काउन्टर दिँदै रास्वपाकै सांसद मनिष झाले परिवर्तनका लागि यति ठूलो जनादेश पाएको सरकारमा कोही एक्लो नभएको बताए । सबै साथमा भएको तर सुधार गर्नुपर्ने धेरै विषयहरु भएको उल्लेख गरेका छन् । उनले लेखेका थिए, ‘परिवर्तनको लागि यो महान् जनादेश पाएको सरकारमा कोही एक्लो छैन। हामी सबै साथमा छौँ। हिजो सदनमा भनेको झैँ, नियत र आशयमा शङ्का छैन तर सुधार गर्नै पर्ने केही पक्ष छन्। यो महान् ऐतिहासिक अवसर खेर नजाओस् भनेर सजग रहने र सचेत गराउने काम निरन्तर रहनेछ। जन निर्वाचित सरकार जनताको साथमा हुनुपर्छ र म सरकारको साथमा छु। यहाँ कोही एक्लो छैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
