काठमाडौं– राष्ट्रिय स्वतन्त्र पार्टी (रास्वपा) का सांसद हरि ढकालले सिंहदरबारको नाम परिवर्तन गर्नुपर्ने आफ्नो प्रस्तावको बचाउ गर्दै सिंह दया र करुणाको नभई हिंसा, घमण्ड र शासकको प्रतीक भएको बताएका छन् ।
आइतबार एक कार्यक्रममा सिंहदरबारको नाम परिवर्तन गरी ‘अनामनगर दरबार’ राख्नुपर्ने धारणा राखेका ढकालले त्यसको विरोधमा राष्ट्रिय प्रजातन्त्र पार्टी (राप्रपा) का प्रवक्ता मोहन श्रेष्ठले दिएको अभिव्यक्तिको जवाफ दिँदै यस्तो धारणा सार्वजनिक गरेका हुन् ।
ढकालले सामाजिक सञ्जालमार्फत सिंह र सिंहदरबारको प्रसंगमा आफ्नो तर्कमा आफू अडिग रहेको बताएका छन् ।
‘म मेरो तर्कमा अडिग छु—सिंह दया र करुणाको प्रतीक होइन । सिंह हिंस्रककै प्रतीक हो, घमण्डकै प्रतीक हो, शासककै प्रतीक हो,’ उनले भनेका छन् ।
उनले सिंहदरबार निर्माणका क्रममा श्रमिकमाथि भएको भनिएको शोषणको इतिहास आफूले पहिले नै पढेको उल्लेख गर्दै दरबारको नाम र त्यससँग जोडिएको ऐतिहासिक सन्दर्भबारे पनि प्रश्न उठाएका छन् ।
ढकालले यसअघि नेपालमा सिंह नपाइने भएकाले ‘सिंहदरबार’ नाम उपयुक्त नभएको तर्क गर्दै त्यसको सट्टा ‘अनामनगर दरबार’ नाम राख्नुपर्ने प्रस्ताव गरेका थिए ।
उनको उक्त अभिव्यक्तिप्रति राप्रपा प्रवक्ता मोहन श्रेष्ठले सामाजिक सञ्जालमार्फत कडा प्रतिक्रिया जनाएका थिए । श्रेष्ठले ढकाललाई ‘उपबुज्रुक’ भन्दै उनको नामसमेत परिवर्तन गर्न सुझाव दिएका थिए ।
श्रेष्ठले लेखेका थिए, ‘एउटा उपबुज्रुकले हामीसँग सिंह नै छैन, सिंहदरबार किन राख्ने भनेर सिंहदरबारको नाम फेर्नुपर्ने भनेछन् ! जसको मनमा हरि नै छैन उसको नाम चाहिँ हरि !? गोबर नाम राखे हुन्न ?’
श्रेष्ठको उक्त प्रतिक्रियापछि ढकालले फेरि सामाजिक सञ्जालमार्फत आफ्नो धारणा सार्वजनिक गर्दै आफूले परिवर्तनको विरोध नभई नाम र त्यसको अर्थ तथा ऐतिहासिक सन्दर्भबारे प्रश्न उठाएको बताएका छन् ।
उनले विगतका राजनीतिक परिवर्तनपछि विभिन्न स्थानका नाम परिवर्तन गरिएको उदाहरण दिँदै सिंहदरबारको नाम पनि परिवर्तन गरेर अर्को नाम राख्न सकिने धारणा राखेका छन् ।
ढकालले सिंहदरबारको नाम परिवर्तनको विषयमा आफू मात्र उत्साहित नभएको भन्दै कार्यक्रममा सहभागीहरू उत्साहित भए पनि आफूले उठाएको विषयको पूर्ण सन्दर्भ धेरैले नहेरेको बताएका छन् ।
उनले अन्त्यमा भनेका छन्, ‘सबैको जय होस् । नेपालको जय होस् ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781580295.jpg)
-1764146706.png)
-1786184812.png)
