काठमाडौं – नेपाली कांग्रेसका नेता पूर्णबहादुर खड्काले पार्टीको आधिकारिकताको विवादपछि देखिएको परिस्थितिमा पार्टीको सम्पूर्ण एकताका लागि निर्णायक पहल गर्न सभापति गगन थापालाई आग्रह गरेका छन् ।
सर्वोच्च अदालतले पार्टीको आधिकारिकतासम्बन्धी विवादमा पुनरावलोकनका लागि निस्सा दिएपछि सामाजिक सञ्जालमा कांग्रेसकै नेताहरू तथा कार्यकर्ताबीच आरोप–प्रत्यारोप बढेको भन्दै खड्काले चिन्ता व्यक्त गरेका छन्।
आइतबार सामाजिक सञ्जालमार्फत अपिल जारी गर्दै खड्काले मुलुकको राष्ट्रियता प्रतिकूल अवस्थामा रहेको, लोकतान्त्रिक संविधानमाथि चुनौती सिर्जना भइरहेको र कांग्रेस इतिहासकै प्रतिकूल अवस्थामा पुगेको भन्दै अहिलेको पहिलो आवश्यकता पार्टीको सम्पूर्ण एकता भएको बताएका छन् ।
उनले पार्टीभित्र सहिष्णुता, संवेदनशीलता र सहअस्तित्वको भावना विकास गर्दै संवाद र सहमतिमार्फत सुदृढ एकता कायम गर्नुपर्नेमा जोड दिएका छन् ।
खड्काले पार्टीका जिम्मेवार सबै नेताहरूलाई व्यक्तिगत महत्वाकांक्षा, अहंकार, घमण्ड, प्रतिशोध र कुण्ठाबाट मुक्त भएर सामूहिक भावनाका साथ पार्टी एकताका लागि निर्णायक रूपमा अघि बढ्न आग्रह गरेका छन् ।
सर्वोच्च अदालतको पूर्ण इजलासले पुनरावलोकनका लागि दिएको निस्सा पार्टीलाई एकताबद्ध गर्ने ‘अन्तिम अवसर’ भएको उनको भनाइ छ ।
विशेषगरी सभापति गगन थापालाई आग्रह गर्दै खड्काले भनेका छन्, ‘तपाईं हिम्मत र साहसका साथ तत्काल पार्टीको सम्पूर्ण एकताका लागि अग्र मोर्चामा अग्रसर हुनुस्, हामी अरू सबै यसका लागि सहयोगी हौँ र बन्छौँ ।’
त्यसपछि उनले सभापति थापाको भूमिकालाई निर्णायक भन्दै स्पष्ट शब्दमा भनेका छन्– ‘निर्णायक तपाईं हो– तपाईं !’
पार्टी एकताका लागि वातावरण निर्माण गर्न कांग्रेसका साथै भ्रातृ तथा शुभेच्छुक संस्थाका सबै तहका नेता–कार्यकर्तालाई पनि खड्काले विशेष आग्रह तथा अपिल गरेका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786184812.png)
