काठमाडौं– प्रमुख विपक्षी दल नेपाली कांग्रेसको केन्द्रीय समितिको बैठक सुरु भएको छ।
बैठकमा एजेन्डा प्रस्तुत गर्दै सभापति गगन थापाले प्रधानमन्त्री वालेन्द्र शाह ‘बालेन’को कार्यशैलीप्रति तिखो आलोचना गरेका छन्।
शासकीय अराजकता बढेको भन्दै उनले यसबारे कांग्रेसले कडा आवाज उठाउने बताए।
‘अब शासकीय अराजकताबारे बोल्नुपर्नेछ। मेरो गाडीमा ब्रेक छैन, एक्स्प्रेस वेमा हिँडेको छ भनेर प्रधानमन्त्रीले भन्नुभयो,’ गगनले भने, ‘स्पिडमा हिँड्ने तपाईंको छनोट हो तर लेन मिच्न पाउनुहुन्न।’
‘लेनभन्दा बाहिर भन्नुको अर्थ विधिभन्दा बाहिर जान पाउँदैन। एकपल्ट भयो भने संयोग होला, गल्ती होला भन्न सकिन्छ तर दोहोरिइरहन्छ भने माफी दिने छुट अब हुँदैन,’ उनको चेतावनी थियो।
थापाले कार्यपालिकाले सीमा मिचेर न्यायपालिका र संसद्लाई थिचोमिचो गरेको बताए।
‘कार्यपालिकाले आफ्नो सीमा मान्दैन। न्यायपालिकाको सीमा पनि मेरै ठान्छ,’ गगनले भने, ‘संवैधानिक निकाय पनि आदेश पालक हो भन्छ। संसद् पनि मेरो आदेश पालक हो भन्ने ठान्छ।’
नेपाल अहिले शासकीय अराजकताबाट आक्रान्त भएको दाबी गर्दै उनले प्रश्न गरे, ‘यो अराजकताको छुट हुँदैन। अख्तियार प्रमुखलाई प्रधानमन्त्रीको कार्यकक्षमा थुन्न पाइन्छ?’
थापाले सरकारका मन्त्रीहरूमा ‘छोटे राजा’कै शैली देखिन थालेको टिप्पणी गरे।
सरकारमा रहेका मन्त्रीहरूबाट हरेक दिनजस्तो ‘खुट्टा भाँचिदिन्छु, थुन्दिन्छु’ जस्ता भाषाशैली आएको भन्दै उनले यसलाई खबरदारी गरेर ठीक ठाउँमा ल्याउनु कांग्रेसको जिम्मेवारी भएको बताए। उनले भने, ‘यो सरकारलाई ठीक ठाउँमा ल्याउने जिम्मेवारी हाम्रो हो। किनकि संसद्मा प्रमुख प्रतिपक्षको भूमिकामा कांग्रेस छ।’
बैठकमा उनले २३ र २४ भदौको घटना त्यत्तिकै नभएको भन्दै त्यसअघि २०८१, २०८०, २०७९ आएको बताए।
‘हाम्रो गति र मतिमाथि पटक–पटक हामीले नै प्रश्न उठाएकै थियो। यसपछि २१ फागुन २०८२ को प्रतिनिधिसभा निर्वाचन आयो। हाम्रो गतिलाई मन नपराएर रिसाएका मतदाताले ब्यालेटमार्फत प्रतिपक्षमा पुर्याइदिए। हाम्रै वरिष्ठ नेता अर्जुननरसिंह केसीले जुनसुकै बेला नेपालमा बंगलादेशको स्थिति आउन सक्छ भनेर औपचारिक बैठकमै भनेका थिए। अझै पनि हाम्रो गति र मति ठीक भइसकेको छैन। यसमाथि प्रतिरोध हुन सक्छ।’
थापाले २१ फागुनको निर्वाचनमा कांग्रेसविरुद्ध नागरिकले रिस पोखेको बताए।
सत्ताधारी दल राष्ट्रिय स्वतन्त्र पार्टीले २१ फागुनमा ब्यालेटमार्फत ल्याएको परिवर्तनलाई सम्मान गर्ने, तर उसले जनतामा अझै पनि परिवर्तनको आभास दिलाउन नसकेको उनको दाबी थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786157138.png)
-1786184812.png)
