काठमाडौं– विभिन्न राजनीतिक दलका नेताहरूले बालेन शाह नेतृत्वको सरकारको कार्यशैली, सुशासन, जनसरोकार, राष्ट्रिय स्वाधीनता, आन्दोलन र अभिव्यक्ति स्वतन्त्रताका विषयमा प्रश्न उठाउँदै सरकारलाई बढी जवाफदेही र जिम्मेवार बन्न आग्रह गरेका छन्।
शुक्रबार राष्ट्रिय प्रेस क्लबमा आयोजित ‘सरकारको कार्यशैली लगायत समसामयिक राजनीतिक विषय’ अन्तर्क्रिया कार्यक्रममा सहभागी नेताहरूले सरकारको कामकारबाहीप्रति असन्तुष्टि जनाउँदै जनताका समस्या समाधानमा केन्द्रित हुनुपर्ने धारणा राखे।
नेपाल संघीय समाजवादी पार्टीका अध्यक्ष मोहम्मद रिजवान अन्सारीले सरकार भ्रष्टाचार नियन्त्रणभन्दा उल्टै विवादमा केन्द्रित भएको आरोप लगाए। सडक आन्दोलनका क्रममा भएको गोली प्रहार र त्यसपछिका घटनाबारे सरकारले स्पष्ट जवाफ दिनुपर्ने उनको माग थियो।
कम्युनिष्ट समाजवादी पार्टी नेपालका संयोजक हरिकृष्ण गजुरेलले ठूलो जनमत पाए पनि सरकारले अपेक्षित परिणाम दिन नसकेको दाबी गरे। दण्डहीनता बढ्दै गएको, जनताका समस्या समाधान हुन नसकेको र सरकार सामाजिक सञ्जालका गतिविधिमै सीमित भएको उनको टिप्पणी थियो।
पहिलो पार्टी नेपालका संयोजक गोविन्द बोहरा ब्रह्माण्डले जेनजी आन्दोलनका क्रममा भएको सरकारी वार्ताको उद्देश्यबारे प्रश्न उठाउँदै शासकीय संरचनामा सुधार आवश्यक रहेको बताए।
नेपाल समावेशी पार्टीका अध्यक्ष मोतिलाल भारती ले सरकार जनताको अपेक्षाअनुसार सञ्चालन हुन नसकेको आरोप लगाए। उनले लिपुलेक, अभिव्यक्ति स्वतन्त्रता, हिन्दु–मुस्लिम सम्बन्ध र वैदेशिक रोजगारीजस्ता विषयमा सरकारको भूमिकामाथि प्रश्न उठाउँदै जनताका गुनासा सुन्न सरकार तयार हुनुपर्ने बताए।
सचेत नेपाली पार्टीका अध्यक्ष पुण्य प्रसाईंले बालेन सरकारलाई युवाहरूको आन्दोलनबाट बनेको सरकारको संज्ञा दिँदै पुराना राजनीतिक शक्तिहरूले सरकारमाथि दबाब सिर्जना गर्न सक्ने दाबी गरे। उनले सुकुम्बासी समस्या समाधान, राष्ट्रिय स्वाधीनताको रक्षा तथा सम्भावित आन्दोलनप्रति सरकार गम्भीर हुनुपर्ने धारणा राखे।
कार्यक्रममा सहभागी नेताहरूले सरकारलाई सुशासन, पारदर्शिता, जनउत्तरदायित्व, आलोचनाप्रति सहिष्णुता र प्रभावकारी सेवा प्रवाह सुनिश्चित गर्दै जनविश्वास कायम गर्न आग्रह गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
