काठमाडौं – सरकारले शासकीय सुधार, सुशासन प्रवर्द्धन, विकास आयोजना अनुगमन तथा सेवा प्रवाह सुधारलाई प्राथमिकतामा राख्दै आफ्ना सय बुँदे कार्यसूचीको कार्यान्वयनलाई निरन्तरता दिएको जनाएको छ।
प्रधानमन्त्री तथा मन्त्रिपरिषद्को कार्यालयले सार्वजनिक गरेको आर्थिक वर्ष २०८२/८३ को चौथो त्रैमासिक (वैशाख–असार) प्रगति विवरणअनुसार यस अवधिमा मन्त्रिपरिषद्का २१ वटा बैठकबाट ३८४ निर्णय भएका छन्। मन्त्रिपरिषद्का विभिन्न समितिका ८ बैठकबाट थप १२ निर्णय गरिएको उल्लेख छ।
जेन्जी आन्दोलनपछि सेवा प्रवाहलाई प्रभावकारी बनाउन सचिवस्तरीय बैठक आयोजना गरी कार्यालय प्रमुखहरूलाई अनियमितता र ढिलासुस्ती हटाउन निर्देशन दिइएको सरकारको दाबी छ। यस अवधिमा पुँजीगततर्फ ६८.२६ प्रतिशत र चालूतर्फ १७.०७ प्रतिशत वित्तीय प्रगति भएको जनाइएको छ।
सरकारले शासकीय सुधारसम्बन्धी सय बुँदे कार्यसूचीअन्तर्गत तयार गरिएको ‘राष्ट्रिय प्रतिबद्धता’ असार १८ गतेको मन्त्रिपरिषद् बैठकबाट स्वीकृत गरेको छ। साथै सिराहा, उदयपुर र सोलुखुम्बुमा शासकीय सुधार संवाद श्रृंखला सञ्चालन गरिएको विवरणमा उल्लेख छ।
यस्तै, ‘मानव अधिकारसम्बन्धी छैटौँ राष्ट्रिय कार्ययोजना’ र ‘भ्रष्टाचारविरुद्धको संयुक्त राष्ट्रसंघीय महासन्धिको कार्यान्वयनसम्बन्धी दोस्रो राष्ट्रिय रणनीति’ मन्त्रिपरिषद्बाट स्वीकृत भएका छन्। सरकारले ‘नेपाल सरकार (कार्यविभाजन) नियमावली, २०८३’ कार्यान्वयनमा ल्याउनुका साथै सम्पत्ति शुद्धीकरण निवारणसम्बन्धी अन्तर्राष्ट्रिय निकाय (एपीजी) को कार्ययोजना कार्यान्वयनबारे उच्चस्तरीय छलफल गरेको जनाएको छ।
कार्यालयका अनुसार ‘शून्य बाँकी फाइल अभियान सञ्चालन मार्गदर्शन, २०८२’ जारी गरी सबै निकायबाट एकीकृत प्रगति प्रतिवेदन माग गरिएको छ।
विकास आयोजनातर्फ कालिगण्डकी करिडोर र नारायणगढ–बुटवल सडक खण्डलगायत ठूला परियोजनाको स्थलगत अनुगमन गरिएको छ। लामो समयदेखि अलपत्र परेका ५७८ रुग्ण ठेक्काको विश्लेषण गरी समाधानका उपाय प्रस्ताव गरिएको तथा हेटौंडा कपडा उद्योग पुनः सञ्चालनको प्रक्रिया पनि अघि बढाइएको सरकारको दाबी छ।
यसैबीच सरकारी खर्चमा मितव्ययिता कायम गर्न संघीय मन्त्रालय र स्थानीय तहलाई परिपत्र जारी गरिएको छ। ‘हेलो सरकार’ प्रणालीमा प्राप्त ४४ हजार ३४० गुनासोमध्ये ३२ हजार ६७ वटा फर्छ्योट गरिएको तथा सूचनाको हकअन्तर्गत प्राप्त ४९ निवेदनमा सूचना उपलब्ध गराइएको प्रधानमन्त्री तथा मन्त्रिपरिषद्को कार्यालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
