काठमाडौं– स्मार्ट सेल प्रकरणमा अनुसन्धान गरिरहेको नेपाल प्रहरीको केन्द्रीय अनुसन्धान ब्युरो (सीआईबी) ले नेपाल इन्भेस्टमेन्ट मेगा बैंक (एनआईएमबी) का अध्यक्ष पृथ्वीबहादुर पाण्डेसहित १५ जनाविरुद्ध पक्राउ अनुमति लिएपछि सर्वोच्च अदालतले केही प्रतिवादीलाई तत्काल पक्राउ नगर्न अल्पकालीन अन्तरिम आदेश जारी गरेको छ।
न्यायाधीश टेकप्रसाद ढुंगानाको एकल इजलासले रिटमाथिको अन्तिम निर्णय नआउँदासम्म निवेदकहरूलाई पक्राउ नगर्न आदेश दिएको हो। अदालतले सीआईबीलाई पक्राउको आधार र कारणसहित एक साताभित्र उपस्थित हुन पनि निर्देशन दिएको छ।
सीआईबीले स्मार्ट टेलिकमको धितो लिलामी तथा करिब ३५ अर्ब रुपैयाँ बराबरको आर्थिक अनियमिततासम्बन्धी अनुसन्धानका क्रममा जिल्ला अदालतबाट पक्राउ अनुमति लिएको थियो। त्यसपछि बैंकका प्रमुख कार्यकारी अधिकृत (सीईओ) ज्योतिप्रकाश पाण्डे सर्वोच्च अदालत पुगेका थिए। उनले अध्यक्ष पृथ्वीबहादुर पाण्डे तथा सञ्चालकहरू प्रणयराज भण्डारी, दीपांकर शाक्य, कविकुमार तिवडेवाल, शालिकराम बेलवासे र शोभा श्रेष्ठलाई पक्राउ गर्न लागिएको भन्दै उत्प्रेषणयुक्त प्रतिषेधको आदेश माग गरेका थिए।
अनुसन्धानकै क्रममा नेपाल राष्ट्र बैंकले सीआईबीको पत्रपछि अध्यक्ष पाण्डेसहित सम्बन्धित सञ्चालकहरूको व्यक्तिगत बैंक खाता रोक्का गरेको स्रोतले जनाएको छ। यद्यपि, यस विषयमा राष्ट्र बैंकले औपचारिक धारणा सार्वजनिक गरेको छैन।
स्मार्ट सेलको धितो लिलामी प्रक्रिया राष्ट्र बैंकको निर्देशन, सर्वोच्च अदालतको पूर्व फैसला तथा प्रचलित कानुनविपरीत भएको आशंकामा सीआईबीले अनुसन्धान अघि बढाएको जनाएको छ। यही प्रकरणमा यसअघि बैंकका सीईओ ज्योतिप्रकाश पाण्डे पक्राउ परेका थिए भने पछि सर्वोच्च अदालतको आदेशबाट रिहा भएका थिए।
सर्वोच्चको अन्तरिम आदेशसँगै स्मार्ट सेल प्रकरणमा बैंकका अध्यक्ष तथा केही सञ्चालकको पक्राउ प्रक्रिया तत्कालका लागि रोकिएको छ भने अनुसन्धान भने यथावत् जारी रहनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
