काठमाडौं– मोरक्कोका महामहिम राजा मोहम्मद छैटौँको २७औँ राजगद्दी आरोहण दिवस (राष्ट्रिय दिवस)को अवसरमा नेपालस्थित मोरक्को अधिराज्यका लागि महावाणिज्यदूतको कार्यालयले आइतबार काठमाडौंमा विशेष समारोह तथा विविध कार्यक्रम आयोजना गरेको छ।
कार्यक्रमको शुभारम्भ थापाथलीस्थित महावाणिज्यदूतको कार्यालयमा आयोजित झण्डोत्तोलन समारोहबाट गरिएको थियो। नेपालका लागि मोरक्कोका राजदूत मोहम्मद मलिकी र नेपालका लागि मोरक्को अधिराज्यका महावाणिज्यदूत मेघा चौधरीले राष्ट्रिय झण्डा फहराउँदै कार्यक्रम उद्घाटन गरेका थिए । सो अवसरमा नेपाल र मोरक्को दुवै देशको राष्ट्रिय गान प्रस्तुत गरिएको थियो।
समारोहमा परराष्ट्र मन्त्रालयका शिष्टाचार महापाल, नेपालस्थित कूटनीतिक नियोगका प्रमुख तथा प्रतिनिधि, व्यवसायी र विभिन्न क्षेत्रका विशिष्ट व्यक्तित्वहरूको उपस्थिति रहेको थियो।
महावाणिज्यदूत मेघा चौधरीले राजा मोहम्मद छैटौँप्रति शुभकामना व्यक्त गर्दै उनको सुस्वास्थ्य, दीर्घायु तथा मोरक्कोको शान्ति, समृद्धि र निरन्तर विकासको कामना गरे। उनले नेपाल र मोरक्कोबीचको मैत्रीपूर्ण सम्बन्ध व्यापार, पर्यटन, लगानी तथा सांस्कृतिक आदान–प्रदानमार्फत थप सुदृढ हुने विश्वास व्यक्त गरे ।
यसै अवसरमा ललितपुरस्थित 'द प्लाजा'मा मोरक्कोको समृद्ध संस्कृति, इतिहास र पर्यटन प्रवर्द्धन गर्ने उद्देश्यले विशेष प्रदर्शनी पनि आयोजना गरिएको छ। बिहान ११ बजेदेखि साँझ ५ बजेसम्म सञ्चालन हुने प्रदर्शनीमा प्रवेश निःशुल्क राखिएको छ।
प्रदर्शनीमा मोरक्कन परिकार, परम्परागत पोटरी, मोरक्कन शैलीको सजावट, पर्यटनसम्बन्धी जानकारी तथा ट्राभल डेस्क राखिएको छ। आयोजकका अनुसार प्रदर्शनीले नेपालीहरूलाई मोरक्कोको कला, संस्कृति र पर्यटनसँग परिचित गराउनुका साथै दुई देशबीचको सांस्कृतिक तथा जनस्तरीय सम्बन्धलाई थप सुदृढ बनाउन सहयोग पुग्ने अपेक्षा गरिएको छ।
आइतबार साँझ मोरक्को र नेपालको पर्यटन तथा संस्कृतिका विषयमा विशेष संवाद कार्यक्रम आयोजना गरिएको छ। कार्यक्रममा मोरक्कोको कला, संस्कृति र पर्यटन झल्किने डकुमेन्ट्री पनि प्रदर्शन गरिने जनाइएको छ।
गत फागुनमा नेपालका लागि मोरक्को अधिराज्यको अवैतनिक महावाणिज्यदूत नियुक्त भएकी मेघा चौधरीले नियुक्तिपछि दुई देशबीचको कूटनीतिक, सांस्कृतिक, पर्यटन तथा व्यापारिक सम्बन्ध विस्तारमा सक्रिय भूमिका खेल्दै आएकी छिन्।
उनकै पहलमा नेपाली नागरिकले अब काठमाडौंस्थित महावाणिज्यदूतको कार्यालयबाट सिफारिस पत्र लिएर भीएफएस ग्लोबलमार्फत मोरक्कोको भिसाका लागि आवेदन दिन र भिसा प्राप्त गर्न सक्ने व्यवस्था गरिएको छ। यस व्यवस्थासँगै भिसा प्रक्रियाका लागि भारत जानुपर्ने बाध्यता हटेको जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821309.webp)
-1786602170.png)
-1789631269.jpg)
