नयाँ दिल्ली– दक्षिण कश्मीरको कुलगाम जिल्लामा दुई हिन्दू मजदुरको गोली हानी हत्या गरिएको छ। भारतीय गुप्तचर स्रोतका अनुसार यो आक्रमण लश्कर–ए–तैयबासँग आबद्ध मानिने द रेजिस्टेन्स फ्रन्टका आतंकवादीले गरेको हो।
स्रोतका अनुसार, आक्रमणको नेतृत्व मोहम्मद लतीफले गरेको बताइएको छ। उनीमाथि गत जुलाई २२ मा अनन्तनागको लाल चौक क्षेत्रमा हेड कन्स्टेबल आशिक हुसेन कुरैशीको दिनदहाडै हत्या गरेको आरोप पनि छ।
शुक्रबार राति करिब ८:३० बजे कुलगामको केलामस्थित एउटा इँटा भट्टामा काम गरिरहेका दुई हिन्दू मजदुरलाई आतंकवादीले नाम सोधेर नजिकबाट गोली हानेका थिए। घटनास्थलमा रहेका अन्य मजदुरले प्रहरीलाई जानकारी दिएका थिए। मृतक दुवै भारतको छत्तीसगढ राज्यका बासिन्दा हुन्।
प्रारम्भिक जानकारीअनुसार, आक्रमणकारी मोटरसाइकलमा आएका थिए। उनीहरूले मजदुरहरूको परिचयपत्र जाँच गरी निकै नजिकबाट गोली चलाएका थिए। स्थानीयवासीका अनुसार घटनाका क्रममा १०–१२ राउन्ड गोली चलेको आवाज सुनिएको थियो।
स्थानीयका अनुसार उक्त क्षेत्रमा काम गर्ने मजदुरमध्ये यी दुई जना मात्रै हिन्दू रहेका थिए । भीडमा मजदुरहरुको नाम र धर्म सोधिएको, त्यसपछि दुई जनाले परिचयपत्र देखाएपछि उनीहरुलाई अन्यभन्दा भिन्नै पारेर गोली हानी हत्या गरेको प्रत्यक्षदर्शी मजदुरले प्रहरीलाई बताएका छन् ।
सुरक्षा निकायका अनुसार, यस आक्रमणको उद्देश्य आतंकवादी सञ्जाल अझै सक्रिय रहेको सन्देश दिनु हुन सक्ने अनुमान गरिएको छ। गुप्तचर स्रोतहरूले सीमापार रहेका लश्करका सञ्चालकहरूको योजनाअनुसार आक्रमण भएको आशंका व्यक्त गरेका छन्। यस घटनामा पाकिस्तानमा रहेका जैश–ए–मोहम्मदका वरिष्ठ ह्यान्डलर साज्जाद जट्ट उर्फ सैफुल्लाहमाथि पनि शंका गरिएको बताइएको छ।
प्रहरीले घटनास्थलमा जडान गरिएका सीसीटीभी क्यामेराको फुटेजको अनुसन्धान गरिरहेको छ। विगत केही वर्षदेखि कश्मीरका इँटा भट्टामा यस्ता आक्रमण दोहोरिन थालेपछि त्यहाँ सीसीटीभी जडान गर्न निर्देशन दिइएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1785588615.png)
-1764146706.png)
