काठमाडौं– नेपाली कांग्रेसका सभापति गगनकुमार थापाले राजनीतिक नेतृत्वमा करुणा र सहानुभूति हुनुपर्ने बताएका छन् । ललितपुरको सानेपास्थित पार्टी केन्द्रीय कार्यालयमा आयोजित ‘विपद् पूर्वतयारी तथा प्रतिकार्य प्रशिक्षण’ कार्यक्रमलाई सम्बोधन गर्दै उनले नेतृत्वको प्रमुख गुण मानवीय संवेदना हुनुपर्ने बताएका हुन्।
सभापति थापाले आगामी साउन २४ गतेदेखि पार्टीले ‘एनसी फर एनसी’ अभियान सुरु गर्न लागेको जानकारी दिए। यस अभियानअन्तर्गत पार्टीका प्रत्येक नेता तथा कार्यकर्ताले वर्षभर आफूलाई कुनै न कुनै सामाजिक वा राष्ट्रिय कार्यमा संलग्न गराउनुपर्ने नीति लिइएको उनले स्पष्ट पारे।
विपद् व्यवस्थापनसम्बन्धी तालिम लिइरहेका सहभागीहरूलाई लक्षित गर्दै उनले यस वर्षको आफ्नो सङ्कल्प विपद् प्रतिकार्यसँग जोड्न आग्रह गरे। आधुनिक युगमा नेतृत्वका लागि ज्ञान र प्रविधिको सीप मात्र पर्याप्त नहुने तर्क उनले गरे।
सम्बोधनका क्रममा थापाले भने, ‘एनसी फर एनसी भनेर हामीले जुन अभियान सुरु गरेका छौँ, यो साउन २४ गतेदेखि पार्टीका साथीहरूले आफ्नो काम सुरु गर्नुहुन्छ । पहिलो दिनदेखि नै हामी प्रत्येकले कुनै न कुनै एउटा कामसँग आफूलाई वर्षभरि जोड्छौँ । प्रशिक्षणमा आएका साथीहरूले यो वर्षका लागि आफ्नो नेसनल कजको प्रतिबद्धता विपद् व्यवस्थापनसँग जोडेर बनाइदिनुहोस्।’
युवासँगको छलफल प्रसङ्ग जोड्दै उनले थपे, ‘केही दिनअघि म केही तन्नेरी साथीहरूसँग राउन्ड टेबलमा बसेको थिएँ। अनौपचारिक चिया गफमा मैले यो शताब्दीमा नेतामा हुनुपर्ने सबैभन्दा ठुलो गुण के हो भनेर प्रश्न राखेँ ।’
धेरैले ज्ञान र प्रविधिको कुरा गरे पनि असल नेता बन्न करुणा चाहिने उनले बताए। उनले भने, ‘जसको मनमा करुणा र सहानुभूति छैन, उसले नेतृत्व गर्न सक्दैन ।’ बाढी, पहिरो वा विपद्का बेला कसले ज्यान गुमायो र कसलाई कस्तो पीडा भयो भन्ने महसुस गर्न सक्ने क्षमता नै नेतृत्वको आधार भएको उनले बताए।
थापाले भने, ‘यदि करुणा, माया र सहानुभूति हरायो भने हामी केवल मेसिन जस्ता बन्छौँ, जहाँ भ्युज र लाइक मात्र महत्त्वपूर्ण हुन्छ । लाइफ र लाइकबिच रोज्नुपरे लाइफ रोज्न सक्ने नेता बन्नुहोला । लाइफ सबैभन्दा महत्त्वपूर्ण हो, लाइक पछि आउँछ ।’
सामाजिक सञ्जालको चर्चा (लाइक) र मानवीय जीवन (लाइफ) बिचको भिन्नता उल्लेख गर्दै उनले भर्चुअल लोकप्रियताभन्दा नागरिकको जीवन रक्षा र सेवालाई प्राथमिकता दिन युवाहरूलाई सुझाव दिए। नेपाली कांग्रेस केन्द्रीय नीति,अनुसन्धान तथा प्रशिक्षण प्रतिष्ठानद्वारा आयोजित उक्त कार्यक्रममा थापाले प्रशिक्षणबाट प्राप्त ज्ञानलाई समाजको तल्लो तहसम्म पुर्याउन र विपद्को समयमा प्रभावकारी भूमिका निर्वाह गर्न प्रशिक्षार्थीहरूलाई निर्देशन समेत दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
