धनगढी- चिकित्सा शिक्षा सुधारका अभियान्ता प्रा. डा. गोविन्द केसीले आफ्ना ५ बुँदे माग सम्बोधन नभएको भन्दै आज साउन ७ गते देखि कैलालीको धनगढीमा पुनः आमरण अनसन (सत्याग्रह) सुरु गरेका छन् ।
सरकारलाई माग पूरा गर्न दिएको साउन ५ गतेसम्मको समयसीमालाई पूर्ण रूपमा बेवास्ता गरेपछि बाध्य भएर सत्याग्रहमा बस्नुपरेको उनले जारी गरेको प्रेस विज्ञप्तिमा उल्लेख छ।
डा केसीले धनगढीमा ३ बजे पत्रकार सम्मेलन गर्दै अनसनका विषयमा जानकारी दिने तयारी गरेका छन्। '३ बजे धनगढीको कृष्णमन्दिर परिशरको धर्मशालामा पत्रकार सम्मेलन रहेको कुरा जानकारी गराउदछौं,' विज्ञप्तिमा भनिएको छ।
डा. केसीले चिकित्सा शिक्षा आयोग र शहीद दशरथ चन्द मेडिकल विश्वविद्यालयमा भएका स्वार्थको द्वन्द्व प्रेरित गैरकानुनी नियुक्तिहरू तत्काल बदर गर्न, छात्रवृत्ति कटौती गर्ने तथा निजी कलेजमा सिट बढाउने प्रस्ताव खारेज गर्न, र 'राष्ट्रिय चिकित्सा शिक्षा ऐन, २०७५' अनुसार चिकित्सा शिक्षालाई पूर्ण गैरनाफामूलक बनाउने प्रावधान शीघ्र कार्यान्वयन गर्न माग गरेका छन्।
साथै, सुदूरपश्चिमको गेटा मेडिकल कलेजमा माफिया र राजनीतिक स्वार्थका कारण ढिलाइ गरिएको आरोप लगाउँदै उनले सीमावर्ती क्षेत्रका नागरिकका लागि स्वास्थ्य पूर्वाधार विस्तार गर्न र २०४६ सालदेखिका उच्चपदस्थ भ्रष्टाचारीहरूमाथि निष्पक्ष छानबिन गरी कारबाही गर्नसमेत जोड दिएका छन्।
सत्याग्रहबाट उत्पन्न हुने जुनसुकै विषम परिस्थितिको शतप्रतिशत जिम्मेवार वर्तमान सरकार नै हुने चेतावनी डा. केसीले दिएका छन्।
यस्ता छन् डा केसीमा माग
१. स्थापित नियम र मूल्य-मान्यता विपरीत स्वार्थको द्वन्द्व हुने गरी दशरथ चन्द मेडिकल विश्वविद्यालय लगायत चिकित्सा शिक्षा आयोगमा गरिएका गैरकानुनी र स्वार्थपरक नियुक्तिहरू तत्काल बदर गरी ऐनका विवादित प्रावधानहरू शीघ्र संशोधन गरियोस्।
२. चिकित्सा शिक्षा आयोगमार्फत छात्रवृत्ति कटौती गर्ने र मापदण्ड तथा पूर्वाधारविना निजी कलेजहरूमा सिट वृद्धि गर्ने निर्णय वा प्रस्तावहरू तत्काल खारेज गरियोस्।
३. 'राष्ट्रिय चिकित्सा शिक्षा ऐन, २०७५' बमोजिम चिकित्सा शिक्षालाई पूर्ण गैरनाफामूलक बनाउने कानुनी प्रावधान शीघ्र कार्यान्वयन गरियोस्। साथै विगतका सरकारहरूसँग भएका लिखित सहमतिहरू कार्यान्वयन गरियोस्।
४. सुदूरपश्चिम लगायत सीमावर्ती क्षेत्रका नागरिकहरू स्वास्थ्य, शिक्षा, यातायात र रोजगारीका लागि छिमेकी मुलुकसँग परनिर्भर हुनुपर्ने बाध्यताको अन्त्य गर्दै नागरिक अधिकार र राष्ट्रिय आत्मसम्मानको रक्षाका लागि आवश्यक पूर्वाधार र सेवा प्राथमिकताका साथ विस्तार गरियोस्।
५. २०८२ भदौ २३ र २४ मा भएका जघन्य हत्या, आगजनी, लुटपाट र विनाशका दोषीहरूलाई कडा कारबाही गरियोस् तथा २०४६ सालदेखि हालसम्म उच्च पदस्थ राजनीतिज्ञ र पदाधिकारीहरूबाट भएका भ्रष्टाचार एवं अपराधको निष्पक्ष छानबिन गरी दोषीमाथि कारबाही गरियोस्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786513116.png)
