काठमाडौं– बेलायतका प्रधानमन्त्री कीएर स्टार्मरले आफ्नो पदबाट राजीनामा दिएका छन्। अब बेलायतका नयाँ प्रधानमन्त्रीका रूपमा चाँडै नै एन्डी बर्नहमले शपथ लिनेछन्।
राजीनामा दिएपछि स्टार्मरले बकिङ्घम दरबारमा राजा चार्ल्ससँग भेट गरेका छन्। सत्ता हस्तान्तरणको प्रक्रियामा यो भेटलाई परम्परागत औपचारिकताको रूपमा लिइन्छ।
स्टार्मरको भेटको केही समयपछि एन्डी बर्नहम पनि राजा चार्ल्ससँग भेट गर्न बकिङ्घम दरबार पुगेका छन्।
स्टार्मरको राजमहल भ्रमणबारे बकिङ्घम दरबारले जारी गरेको विज्ञप्तिमा भनिएको छ, "सांसद सर कीएर स्टार्मरले आज बिहान महाराजसँग भेट गरी प्रधानमन्त्री तथा ट्रेजरीका फर्स्ट लर्ड पदबाट आफ्नो राजीनामा पेश गर्नुभयो। महाराजले उक्त राजीनामा सहर्ष स्वीकार गर्नुभयो। साथै, लेडी स्टार्मरलाई पनि महाराजले स्वागत गर्नुभयो।"
स्टार्मरको राजीनामापछि बेलायतमा जीवित पूर्वप्रधानमन्त्रीहरूको संख्या बढेर नौ पुगेको छ, जुन अहिलेसम्मकै उच्च संख्या हो।
यी जीवित पूर्वप्रधानमन्त्रीहरूमा जोन मेजर, टोनी ब्लेयर, गोर्डन ब्राउन, डेभिड क्यामरुन, थेरेसा मे, बोरिस जोन्सन, लिज ट्रस, ऋषि सुनक र कीएर स्टार्मर रहेका छन्।
८३ वर्षीय जोन मेजर सबैभन्दा वृद्ध जीवित पूर्वप्रधानमन्त्री हुन् भने ४६ वर्षीय ऋषि सुनक सबैभन्दा कम उमेरका जीवित पूर्वप्रधानमन्त्री हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
