काठमाडौं– प्रतिनिधिसभा बैठकमा सञ्चारमाध्यम र विभिन्न स्थानमा शंकास्पद रूपमा गाडी तेर्स्याएर गरिएको अवरोध प्रयासको विषय उठेकाे छ ।
मंगलबारको प्रतिनिधिसभा बैठकमा बोल्दै नेकपा (एमाले) का सांसद गणेशसिंह ठगुन्नाले सञ्चारमाध्यम तथा राजनीतिक नेतृत्वको निवास र कार्यालयअगाडि मानसिक त्रास सिर्जना गर्ने उद्देश्यले गरिएको गतिविधिप्रति आपत्ति जनाएका हुन् ।
उनले पहिलो नजरमा सामान्य देखिए पनि यस्ता गतिविधिले विगतको पञ्चायतकालीन मण्डलेतन्त्र र राज्य आतंकको सुरुआती संकेतको झझल्को दिलाउने टिप्पणी गरे । लोकतान्त्रिक व्यवस्थामा यस्ता गतिविधि स्वीकार्य नहुने भन्दै घटनामा संलग्न व्यक्तिहरूमाथि सरकारले कडा कारबाही गर्नुपर्ने उनको माग थियो ।
सांसद ठगुन्नाले अभिव्यक्ति स्वतन्त्रता, सञ्चारमाध्यमको स्वतन्त्रता तथा नागरिकको सुरक्षामाथि चुनौती दिने कुनै पनि गतिविधिलाई राज्यले गम्भीर रूपमा लिनुपर्ने बताए ।
सोमबार कान्तिपुर, हिमालयन टेलिभिजन र अनलाइनखबरको कार्यालय गेटअगाडि अन्य सवारीसाधनको आवागमन अवरुद्ध हुने गरी गाडी पार्क गरिएको थियो ।
त्यस्तै, काठमाडौंको अनामनगर क्षेत्रमा पनि शंकास्पद गाडीका कारण केही समय सवारी आवागमन प्रभावित भएको थियो । उक्त घटनाबारे प्रहरीले अनुसन्धान गरिरहेको जनाएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
