काठमाडौं– नेपाली कांग्रेसका सांसद खडकबहादुर शाहीले सरकारले दिनदहाडै हैकमवाद चलाएको भन्दै आफूले मुगुवासीलाई आन्दोलनमा आउन आह्वान गरेको बताएका छन् ।
शुक्रबार प्रतिनिधिसभाको बैठकमा बोल्दै उनले सरकारले गरिबलाई रुवाएको बताए ।
‘सरकारले गरिब जनतालाई रुवाएको छ, यसका विरुद्धमा मैले मुगुका जनताहरू सम्पूर्ण सबैलाई र आत्मभावना तथा मनमा दया–माया रहेका सम्पूर्ण नेपालीलाई आन्दोलनका निम्ति वीर हस्पिटल आउनुस् भनेर आह्वान गरेको छु,’ उनले भने ।
सांसद शाहीले सरकारकै कारणले गरिब निमुखा जनतालाई आफैँ आत्महत्या गर्ने अवस्था पुगेको आरोप लगाए । उनले गणेश नेपालीको हिजै मृत्यु भइसकेको दाबी गर्दै सरकारको नाटक गरेको आरोप लगाए ।
‘हिजो बेलुका म त्यहाँ गएको थिएँ । त्यसपछि आएर आकस्मिक समय लिएर यहाँ बोलेको थिएँ । उसको करिब–करिब डाक्टरले भनेअनुसार ९५ प्रतिशत ऊ बाँच्ने अवस्था छैन भनेर डाक्टरले भन्नुभएको थियो,’ उनले भने, ‘तर आज रातिभरि गृहमन्त्री लगायतका व्यक्तिहरूले रातिभरि जुन किसिमको स्टन्टबाजी गर्नुभएको छ, घरी–घरी एयरपोर्ट, घरी त्यहाँको वीर हस्पिटल रातभरि कुर्नुभएको छ, उहाँका प्रति उहाँले गर्न खोज्नुभएको प्रयास होला ठिकै । तर गणेश नेपाली राति नै बितिसकेका रहेछन् । तर बिहानसम्म घोषणा गरिएन ।’
आफूहरू गएर स्वास्थ्यमन्त्री र हस्पिटलको डीनलगायतका डाक्टरहरूसँग बसेर मृत्यु भएको किन घोषणा नगरेको भनेर प्रश्न गरेको बताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
