काठमाडौँ–राष्ट्रिय प्रजातन्त्र पार्टी (राप्रपा) का संसदीय दलका नेता ज्ञानबहादुर शाहीले कर्णालीमा भएका नागरिकले विपद्को बेला राज्यको उपस्थिति महसुस गर्न नपाएको भन्दै संसद्मा आपत्ति जनाएका छन् ।
प्रतिनिधिसभाको बैठकमा विशेष समय लिएर बोल्दै सांसद शाहीले कर्णाली नदीमा नागरिकहरू डुबेर जीवनको भिख मागिरहँदा सरकार र जनप्रतिनिधिहरू सत्ताको भागबन्डा र मन्त्रीको सवारीमा व्यस्त भएको भन्दै आलोचना गरे ।
‘आज म बोल्न उठेको छैन, पीडा बोलेको छ । कर्णालीको करुण चित्कार यो संसद्मा गुन्जिएको छ । उद्धारका लागि गुहार मागिरहेका नागरिकको डाकोले नदीको किनार थर्कियो, तर राज्यको कानसम्म पुगेन,’ शाहीले भने ।
कर्णाली नदीमा गाडी खसेर मानिसहरू पानीको बिचमा ‘बचाइदिनुहोस् भन्दै चिच्याइरहँदाको बीभत्स दृश्य स्मरण गर्दै शाहीले राज्यको संवेदनहीनतामाथि प्रश्न उठाए । ‘नदीको बिचमा मानिसहरू जीवनको भिख मागिरहेका थिए, त्यही बेला आकाशमा हेलिकप्टर देखियो । तर, त्यो उद्धारका लागि थिएन, केन्द्रीय मन्त्रीको सवारीका लागि थियो,’ उनले भने, ‘एकातर्फ मन्त्री हेलिकप्टरमा सयर गरिरहेका थिए, अर्कातर्फ प्रदेशसभामा भाग पुगेन भन्दै सांसदहरू झगडा गरिरहेका थिए । तर, कर्णालीका निरीह नागरिक भने उद्धार नपाएर नदीमा बगिरहेका थिए ।’
दुर्घटनास्थलमा सुरक्षाकर्मी पुग्न ५ घण्टा लागेको र उनीहरूसँग आवश्यक उद्धार सामग्री समेत नभएको भन्दै शाहीले आक्रोश पोखे । ‘सुरक्षाकर्मी पुग्दा धेरै ढिलो भइसकेको थियो । उद्धार गर्न होइन, मुचुल्का उठाउन पुगे जस्तो भयो,’ उनले भने, ‘यो दुर्घटना मात्र होइन, राज्यको असफलता हो ।’ सो घटनामा ६ जना नागरिक अझै बेपत्ता रहेको उनले जानकारी दिए ।
आफूले पनि सो दुर्घटनामा आफन्त र परिवारका सदस्य गुमाएको बताउँदै शाहीले भने, ‘के कर्णालीका जनता यो देशका नागरिक होइनन् ? यदि कर्णाली पनि नेपाल हो भने, विपद्को बेला राज्य किन अनुपस्थित हुन्छ ? विभेद किन ?’
सांसद शाहीले कर्णालीका नागरिकको ज्यानको मूल्य कति हो भन्दै सरकारसँग स्पष्ट जवाफ माग गरे । उनले सभामुखलाई विशेष अनुरोध गर्दै सरकारका नाममा तत्काल रुलिङ गर्न, घटनाको सत्य तथ्य सार्वजनिक गर्न, उद्धारमा ढिलाइ गर्नेमाथि कारबाही गर्न र पीडित परिवारलाई उचित राहतको व्यवस्था गर्न माग गरे ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
