काठमाडौं– नेपाली कांग्रेसका सभापति गगन थापाले वालेन्द्र शाह नेतृत्वको सरकारले परिणाम दिने भन्दै विधि र प्रक्रिया बाहिर गएर काम गरिरहेको आरोप लगाएका छन् ।
आइतबार पार्टी केन्द्रीय कार्यालयमा सुरु भएको सरकारको सय दिने कामको समीक्षात्मक कार्यक्रममा बोल्दै सभापति थापाले यस्तो आरोप लगाएका हुन् । उनले शाह नेतृत्वको सरकारले २०७४ सालको निर्वाचनपछि तत्कालीन नेपाल कम्युनिस्ट पार्टीको सरकारले जस्तै काम गर्न थालेको बताए ।
उनले भने, ‘सरकार परिणाम दिन्छु भनेर विधि र प्रक्रिया विपरीत गइरहेको छ । विगतमा पनि हामीले यस्तो अभ्यास देखेकै हौं । नेकपाको सरकारभन्दा अहिलेको सरकारमा कुनै भिन्नता देखिएन ।’
सुकुमबासी हटाउने विषयलाई उदाहरणका रुपमा प्रस्तुत गर्दै सभापति थापाले कानुन बनाएर भूमिहीनको समस्या समाधान गर्न सकिने भए पनि सामाजिक सञ्जालमा वाहवाही पाउन पहिला घर भत्काइदिएको आरोप लगाए ।
थापाले शाह नेतृत्वको रास्वपाको एकल सरकार नागरिकको जीवन (लाइफ) भन्दा सामाजिक सञ्जालको लाइक (लोकप्रियता) मा लाग्दा समस्यामा परेको बताए । ‘यो सरकारलाई लाइफभन्दा लाइकको चिन्ता छ, त्यसैमा लागेको छ। भूमिहीनहरूको समस्या कानुन बनाएर समाधान गरेको भए सामाजिक सञ्जालमा लाइक चाहिँ आउँदैनथ्यो, त्यसैले सुकुमबासी बस्तीमा डोजर चलाइयो। सञ्जालमा चर्चा भयो ।’ थापाले बालुवाटारबाट भन्दा सिंहदरबारबाट शासन गरेको भन्दै उनले प्रधानमन्त्री शाहको प्रशंसा गरे ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1783240079.png)
-1764146706.png)
