काठमाडौँ– राष्ट्रिय स्वतन्त्र पार्टी(रास्वपा) की समानुपातिक सांसद सृष्टि भट्टराईले भाइरल भिडियोबारे प्रस्टीकरण दिएकी छन् ।
कारको झ्यालबाट शरीर निकालेर यात्रा गरिरहेको भिडियो भाइरल भएपछि मङ्गलबार सामाजिक सञ्जाल फेसबुकमार्फत प्रस्टीकरण दिएकी हुन् । सांसद भट्टराईको उक्त भिडियोलाई लिएर आलोचना भएपछि उनले प्रस्टीकरण दिनुपरेको हो ।
उक्त भिडियो हालको नभई धेरै अघि व्यक्तिगत रूपमा यात्रा गरिरहेका बेला खिचिएको पुरानो भिडियो भएको उनले बताएकी छन् । सो भिडियो मेरो हालको सार्वजनिक जिम्मेवारी वा सरकारी नियुक्तिपूर्वको निजी समयसँग सम्बन्धित रहेको उनले स्पस्ट पारेकी छन् ।
यस्ताे छ उनकाे स्ट्याटस
हालै सामाजिक सञ्जाल तथा विभिन्न सञ्चार माध्यमहरूमा मेरो एउटा पुरानो भिडियो व्यापक रूपमा साझा भइरहेको प्रति मेरो ध्यानाकर्षण भएको छ। उक्त भिडियोमा म सवारी साधनको चालक नभई यात्रुको रूपमा यात्रा गरिरहेको अवस्थामा देखिन्छु, जहाँ केही क्षणका लागि कारको झ्यालबाट बाहिर हेर्दै तथा रमाइलो गरिरहेको दृश्य देखाइएको छ।
सबैभन्दा पहिले, उक्त भिडियो हालको नभई धेरै अघि व्यक्तिगत रूपमा यात्रा गरिरहेका बेला खिचिएको पुरानो भिडियो हो। सो भिडियो मेरो हालको सार्वजनिक जिम्मेवारी वा सरकारी नियुक्तिपूर्वको निजी समयसँग सम्बन्धित रहेको कुरा स्पष्ट गर्न चाहन्छु।
उक्त भिडियो कुनै सरकारी कार्यक्रम, सार्वजनिक दायित्व वा औपचारिक भूमिकासँग सम्बन्धित थिएन। यो मेरो निजी जीवनको एक सामान्य र सहज क्षण मात्र थियो। भिडियोमा देखिएको गतिविधिलाई कुनै राजनीतिक, प्रशासनिक वा सार्वजनिक सन्देशसँग जोडेर व्याख्या गर्नु उचित नहुन सक्छ।
सार्वजनिक जिम्मेवारीमा रहेका व्यक्तिहरूप्रति नागरिकहरूको चासो स्वाभाविक हुन्छ र म त्यसको सम्मान गर्दछु। तर सार्वजनिक पदमा रहँदैमा व्यक्तिले आफ्नो निजी जीवनका सामान्य क्षणहरू जिउने अधिकार गुमाउँदैन भन्ने विश्वास राख्दछु। म सार्वजनिक पदमा रहे पनि सबैभन्दा पहिले एक नागरिक हुँ, र अन्य नागरिकसरह मेरो पनि निजी जीवन तथा व्यक्तिगत स्वतन्त्रताको अधिकार छ।
साथै, यो सन्दर्भमा एउटा महत्वपूर्ण पक्ष उल्लेख गर्न चाहन्छु। जीवनको कुनै न कुनै चरणमा अधिकांश व्यक्तिहरूले उत्साह, उमेर वा परिस्थितिका कारण यस्ता केही व्यवहार गरेका हुन सक्छन्, जुन ट्राफिक नियम तथा सडक सुरक्षाको दृष्टिकोणले उपयुक्त नहुन सक्छन्। भिडियोमा देखिएको व्यवहारलाई पनि त्यसै सन्दर्भमा बुझिनु उचित हुनेछ। यद्यपि, सडक सुरक्षा र ट्राफिक नियमहरूको पालना सबैको साझा जिम्मेवारी हो भन्ने कुरामा म पूर्ण रूपमा विश्वास गर्दछु। विगतका यस्ता अनुभवहरूबाट सिक्दै भविष्यमा म स्वयंले पनि यस्ता गतिविधि दोहोर्याउने छैन र सम्पूर्ण नागरिकहरूलाई समेत ट्राफिक नियमहरूको पूर्ण पालना गर्दै सुरक्षित यात्रा गर्न आग्रह गर्दछु। यसलाई आलोचना वा विवादको विषयभन्दा पनि सडक सुरक्षा सम्बन्धी सचेतनाको अवसरका रूपमा लिन सकिन्छ भन्ने मेरो अपेक्षा छ।
कुनै एउटा छोटो भिडियो वा सीमित दृश्यका आधारमा व्यक्तिको चरित्र, जिम्मेवारीबोध वा सार्वजनिक प्रतिबद्धताको मूल्याङ्कन गर्नु भन्दा उसको कार्यसम्पादन, व्यवहार र योगदानलाई समग्र रूपमा हेर्नु उपयुक्त हुन्छ भन्ने मेरो धारणा छ।
म आफ्नो जिम्मेवारीप्रति पूर्ण रूपमा प्रतिबद्ध छु र जनताको विश्वासलाई सम्मान गर्दै इमान्दारिता, जवाफदेहिता र समर्पणका साथ आफ्नो दायित्व निर्वाह गरिरहनेछु। मप्रति विश्वास र सद्भाव राख्नुहुने सम्पूर्ण नागरिक तथा शुभेच्छुकहरूलाई हार्दिक धन्यवाद व्यक्त गर्दछु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
