काठमाडौँ– राष्ट्रिय स्वतन्त्र पार्टी (रास्वपा)का सभापति रवि लामिछानेले हालै सम्पन्न आफ्नो भारत भ्रमणका विषयमा विभिन्न राजनीतिक दलका प्रतिनिधिहरूसँग जानकारी आदानप्रदान गरेका छन्।
यस उद्देश्यका लागि सिंहदरबारमा आयोजित सर्वदलीय छलफलमा लामिछानेले भ्रमणका क्रममा भएका भेटघाट तथा समग्र अनुभवबारे जानकारी गराएको जनाइएको छ।
बैठकपछि सञ्चारकर्मीसँग प्रतिक्रिया दिँदै राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले लामिछानेले आफ्नो भारत भ्रमणसँग सम्बन्धित विषयवस्तु सहभागी दलहरूलाई अवगत गराएको बताए।
रास्वपा सभापति लामिछानेले जेठ १८ गतेदेखि पाँच दिनको भारत भ्रमण गरेका थिए। भ्रमण अवधिमा उनले भारतीय प्रधानमन्त्री नरेन्द्र मोदी, विदेश मन्त्री एस जयशंकर, गृहमन्त्री अमित शाह तथा भारतीय जनता पार्टीका अध्यक्ष नितिन नवीनलगायतसँग भेटवार्ता गरेका थिए। स्वदेश फर्किएपछि उनले उक्त भ्रमणबारे जानकारी दिन सर्वदलीय बैठक आयोजना गरेका हुन्।
बैठकका क्रममा आफूले वैदेशिक सम्बन्धका विषयमा राजनीतिक दलहरूले जिम्मेवार र परिपक्व दृष्टिकोण अपनाउनुपर्ने सुझाव दिएको राप्रपा अध्यक्ष लिङ्देनले बताए। उनका अनुसार सरकारका निर्णय वा गतिविधिको प्रभाव समग्र राष्ट्रले वहन गर्नुपर्ने भएकाले विदेश नीति र अन्तर्राष्ट्रिय सम्बन्धका विषयमा सबै पक्षले संयमित र जिम्मेवार व्यवहार प्रदर्शन गर्न आवश्यक रहेको धारणा उनले राखेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
