काठमाडौँ– पूर्वप्रधानमन्त्री डा. बाबुराम भट्टराईले हालै भएको जेन जेड आन्दोलनले नेपालको राजनीतिक संरचनामा उल्लेखनीय परिवर्तन ल्याएको दाबी गरेका छन्।
उनका अनुसार सो आन्दोलनका कारण प्रमुख दुई दलको सहकार्यमा बनेको सरकार ढलेको हो।
भारतको नयाँ दिल्लीस्थित आईटीएम विश्वविद्यालयद्वारा आयोजित राममनोहर लोहिया स्मृति व्याख्यानमा बोल्दै उनले नेपालमा युवापुस्ताको सक्रिय हस्तक्षेपले नयाँ राजनीतिक युगको सुरुआत गरेको बताएका हुन्।
भट्टराईले राममनोहर लोहियाको “सक्रिय समाजले पाँच वर्षसम्म पर्खँदैन” भन्ने विचार स्मरण गर्दै नेपालमा पनि पछिल्लो समयमा भएको प्रदर्शनले यही सन्देश पुष्टि गरेको टिप्पणी गरे। उनका अनुसार जेन जेड पुस्ताले भ्रष्टाचार, सुशासनको अभाव र आर्थिक असमानताविरुद्ध संगठित रूपमा आवाज उठाएको हो।
उनले युवाको प्रत्यक्ष सहभागिताले राजनीतिक रूपान्तरण सम्भव भएको उल्लेख गर्दै हालको परिवर्तनलाई नयाँ पुस्ताको हस्तक्षेपको परिणामका रूपमा व्याख्या गरे। साथै, नेतृत्व तहमा युवा पुस्ताको उदय देखिएको उदाहरणका रूपमा नयाँ नेतृत्व संरचनालाई उनले उल्लेख गरे।
भट्टराईले संविधान जारी भएपछि नेपाल नयाँ राजनीतिक चरणमा प्रवेश गरेको उल्लेख गर्दै परम्परागत दलभन्दा फरक वैकल्पिक राजनीतिक शक्ति निर्माणको आवश्यकता पहिलेदेखि उठाउँदै आएको धारणा दोहोर्याएका छन्।
उनका अनुसार समयक्रममा समाजभित्रका असन्तुष्टि जेन जेड आन्दोलनका रूपमा प्रकट भएका हुन्, जसले राजनीतिक संरचनामा नयाँ नेतृत्वलाई स्थान दिएको छ।
उनले अन्तर्राष्ट्रिय भू-राजनीतिक तनाव र द्वन्द्व बढिरहेको वर्तमान परिस्थितिमा सबै पक्षबीच सहकार्य र समन्वय आवश्यक रहेको धारणा व्यक्त गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
