काठमाडौँ– नेपाली कांग्रेसले बुधवारका लागि कार्यसम्पादन समिति बैठक बोलाएको छ ।
उक्त दिन दिउँसो २ बजे केन्द्रीय कार्यालय सानेपामा बस्नेगरी कार्यसम्पादन समिति बैठक आह्वान भएको कार्यवाहक मुख्यसचिव कृष्णप्रसाद दुलालले जानकारी दिए ।
बैठकको मुख्य एजेन्डा वैशाख ४ गतेका लागि तय गरिएको संसदीय दलको नेता चयन प्रक्रियासम्बन्धी छलफल रहनेछ। उक्त पदका लागि अर्जुनरसिंह केसी, भीष्म आङ्देम्बे, मोहन आचार्य र जनकराज गिरी लगायत नेताहरू आकांक्षी रूपमा देखिएका छन्। साथै, केही समूहले नयाँ पुस्ताबाट नेतृत्व चयन हुनुपर्ने धारणा राख्दै निस्कल राईको नामसमेत अघि सारेका छन्।
शीर्ष तहका नेताहरूबीच सर्वसम्मत रूपमा संसदीय दलको नेता चयन गर्ने विषयमा आन्तरिक छलफल भइरहेको जनाइएको छ।
यसका अतिरिक्त बैठकमा क्रियाशील सदस्यता अद्यावधिक, ‘जरामा जाऔँ’ अभियानलगायत संगठनात्मक विषयमा पनि छलफल हुने कार्यक्रम रहेको छ। पार्टीले नयाँ वर्षको पहिलो दिनदेखि देशभर क्रियाशील सदस्यता अद्यावधिक अभियान सञ्चालन गर्ने तथा त्यससँगै नेताहरूलाई खटाएर एक महिने ‘जरामा जाऔँ’ अभियान अघि बढाउने तयारी गरेको छ।
उक्त बैठकले संसदीय दलको नेतृत्व चयनसँगै संगठनात्मक गतिविधिको आगामी कार्यदिशा तय गर्ने अपेक्षा गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
