काठमाडौं– आगामी फागुन २१ गते हुने निर्वाचनका लागि नेपाली कांग्रेसका तर्फबाट पूर्व भूमी सुधार सहायक मन्त्री जनकराज गिरीले उम्मेदवारी दर्ता गराएका छन्। राजनीतिमा झुट र बेइमानी हाबी हुँदै गएको वर्तमान परिवेशमा बाजुरामा इमानदारी र निष्ठाको पहिचान बनाएका गिरी झन्डै २६ वर्षपछि पुनः चुनावी प्रतिस्पर्धामा उत्रिएका हुन्। पाँच दशक लामो राजनीतिक यात्रामा सादगी र निष्कलंक छवि बनाएका गिरीलाई स्थानीय बुद्धिजीवी र मतदाताले 'राजनीतिक संस्कारका गुरु' का रूपमा चित्रण गरेका छन्।
२०३८ सालबाट नेविसंघमार्फत राजनीति यात्रा सुरु गरेका गिरीले २०४६ र २०६२/६३ को जनआन्दोलनमा अग्रमोर्चामा रहेर संघर्ष गरेका थिए। २०५६ सालमा प्रतिनिधि सभा सदस्यमा भारी मतले विजयी भई मन्त्रीसमेत बनेका उनले राजकीय पदमा रहँदा होस् या नरहँदा, सधैँ बाजुराको विकास र भुइँमान्छेको सेवालाई नै प्राथमिकतामा राखे। व्यक्तिगत लाभ र सम्पत्ति आर्जनभन्दा माथि उठेर जनताको सुख-दुःखमा भिजेका कारण उनी आफ्नै पार्टीभित्र मात्र नभई प्रतिपक्षी दलका कार्यकर्तामाझ पनि उत्तिकै सम्मानित छन्।
यस पटकको निर्वाचनमा बाजुरामा रोचक प्रतिस्पर्धा हुने देखिएको छ। एमालेका लाल बहादुर थापा, नेकपाका प्रकाश बहादुर शाह र रास्वपाका हेमराज थापासहित अन्य स्वतन्त्र उम्मेदवारहरू चुनावी मैदानमा छन्। तर, अधिवक्ता तथा साहित्यकार हर्क खडायतका अनुसार गिरीको राजनीतिक उचाइ र अनुभवको तुलना अन्य उम्मेदवारसँग हुन सक्दैन। उनले राजनीतिलाई पेशा नभई सेवाको रूपमा बुझेकाले बाजुरालाई प्रयोगशाला बन्नबाट जोगाउन अनुभवी र निडर नेतृत्व आवश्यक रहेको मतदाताहरूको तर्क छ।
बाजुराको चुनावी इतिहास हेर्दा यहाँ नेपाली कांग्रेस र नेकपा एमालेबीच नै मुख्य प्रतिस्पर्धा हुँदै आएको छ। २०४८ यताका निर्वाचनमा कांग्रेसले ४ पटक र एमालेले २ पटक जित हासिल गरेका छन्। पछिल्लो २०७९ को स्थानीय निर्वाचनमा एमालेले ६ पालिका जितेर जिल्ला समन्वय समितिमा कब्जा जमाए पनि प्रतिनिधि सभाको समानुपातिकतर्फ कांग्रेस नै पहिलो दल बनेको थियो। यो अस्थिर चुनावी नतिजाले यस पटकको प्रतिस्पर्धा निकै कडा र निर्णायक हुने संकेत गरेको छ।
पार्टीभित्रको आन्तरिक विवाद र गुटबन्दी गिरीका लागि मुख्य चुनौतीका रूपमा देखा परेको छ। निर्वाचनको मुखमा देखिएको असन्तुष्टि र विभाजनको प्रभाव बाजुरामा पनि पर्ने आकलन गरिए पनि गिरीले सबैलाई एकताबद्ध हुन आह्वान गरेका छन्। "कांग्रेस बलियो भए मात्र बाजुराको आवाज बलियो हुन्छ" भन्दै उनले आपसी असमझदारी भुलेर चुनावी अभियानमा होमिन कार्यकर्तालाई आग्रह गरेका छन्। नेविसंघ लगायतका शुभेच्छुक संस्थाहरूले पनि पार्टी एकताको विकल्प नभएकोमा जोड दिएका छन्।
"मैले जीवनका धेरै वर्ष राजनीति र जनसेवामै बिताएँ, सत्ता मेरा लागि लक्ष्य होइन, बाजुरा बनाउने दायित्व हो," भन्दै गिरीले मतदातासँग एक पटक पुनः विश्वास र मत मागेका छन्। अनुभवी नेतृत्वको अभावमा जिल्लाको विकास ओझेलमा परेको महसुस गरिरहेका बाजुराली जनताका लागि गिरीको उम्मेदवारीले नयाँ आशा जगाएको छ। अबको निर्वाचनले बाजुरामा 'युवा र नयाँ' को लहरसँगै 'निष्ठा र अनुभव' को कस्तो सन्तुलन कायम गर्छ, त्यो हेर्न बाँकी नै छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
