काठमाडौं– शान्ति नेपाल जीवनको उत्तरार्द्धमा छोराबुहारीको साथ र नाती नातीनासँग तातेताते गर्दै रमाउनुपर्ने बेला वृद्धाश्रमको कुना छेउमा टोलाएर बसिरहेकी छिन्।
जीवनको उत्तरार्द्धको सहाराका रुपमा बुढेसकालमा जन्मिएको छोराको हुर्काई र हुर्किइसकेपछि बदलिएको परिस्थितिलाई नियाले आफ्नो भाग्यलाई कोस्दैछिन्। आर्थिक क्षमता नहुँदा पनि खेतबारी बेचेर छोरालाई डाक्टरी पढ्नका लागि चाइना पठाइन् शान्तिले।
जब छोरा पढेर फर्किन्छ तब नामचिन डाक्टरसमेत बन्छ। छोराको उन्नतिमा गौरभाम्वित बनेकी शान्तिको छोरा समीरले काठमाडौंमै घरजम गर्छ। एउटा आलीशान घरसमेत खरिद गर्छ। गाउँमा बुवाको निधनपछि आमालाई आफैंसँग राख्न ल्याउँछ पनि।
तर श्रीमतीसँगको अनबनका कारण आमालाई त्यहि छोराको घर साँघुरो हुन्छ। परिस्थिति बदिलिँदा अन्तत: शान्ति वृद्धाश्रममा जान्छिन्। तर पनि एकमात्र सहाराका रुपमा हुर्काएको छोरालाई छाडेर आश्रममा शान्तिको मन लाग्दैन।
आश्रममा मायाँ, स्नेह पाउँदा पनि उनी छोराकै लागि आश्रमबाट निस्किन्छिन्। तर बाटैमा अकस्मात् उनको दुर्घटना हुन्छ। राजीव नाम गरेको पात्रले शान्तिलाई अस्पताल पुर्याउँछ। राजीव आफ्ना बाबुआमा नभएका कारण आश्रमका हरेक वृद्धवृद्धालाई नै आफ्ना अभिभावक मान्छ। राजीवले शान्तिलाई जुन अस्पतालमा पुर्याउँछ। सोही अस्पतालको चिकित्सक हुन्छ समीर।
दुर्घटनाको खबर स्वास्थ्यकर्मीले दिए पनि घरमा काम भएकोभन्दै समीर घर निस्किन्छ। घरमा उसको सँगै पढेको साथी कुरिरहेको हुन्छ। जहाँ मदिरा पार्टीको तयारी भइरहेको हुन्छ। जब साथीले समीरलाई आमा काठमाडौंमा ल्याएको र खोइ? भन्दै सोधीखोजी गर्छ। त्यतिकैमा समीरको छोराले हजुरआमा साथीहरुसँग बस्न गएको जवाफ दिन्छ। र समीरले पनि आफन्तकोमा गएको बताउँछ।
त्यतिकैमा फोनको घन्टी बज्छ। आश्रमबाट आमा हुराउनुभो! आमाको खोजीमा समीर रातभर भौतारिन्छ। तर भेट्दैन। भोलिपल्ट अस्पतालमा पुग्दा आमा आईसीयू कक्षमा भेट्छ। तर समीर पुग्दासम्म शान्तिले परान छाडिसकेकी थिइन्। आमालाई मृत अवस्थामा देखेपछि समीर छाँगाबाट खसेझै हुन्छ। र आमाबाबुले आफ्ना लागि गरेका त्यागहरु र आफूले गरेका व्यवहार सम्झिन्छ र पश्चातापमा आँसु बगाइरहन्छ।
यो कथा हो रामजी ज्ञवालीद्वारा निर्देशित सर्ट फिल्म ‘लापत्ता सन्तान’को। शुक्रबार मात्र रिलिज भएको उक्त फिल्म मात्र २० मिनेटको छ। तर यो कथाले बोल्ने सन्देश भने वर्तमान सामाजिक परिवेशसँग ठ्याक्कै मेल खान्छ।
सन्तानका लागि बाबुआमाको त्याग बलिदान र हुर्किइसकेपछि सन्तानले गर्ने व्यवहार दुरुस्तै ज्ञवालीले फिल्ममा उतारेका छन्। फिल्मको लेखन र निर्माण पनि ज्ञवालीकै हो। शुक्रबार नेपालकै चर्चित युट्युब च्यानल ओएसआर डिजिटलको आधिकारिक च्यानलमार्फत फिल्म रिलिज भएको छ।
फिल्ममा शीर्ष कलाकारहरू रश्मी भट्ट, ओजस्वी विक्रम विष्ट, आशिष पराजुली, सबिना राउत, निलम भट्ट, मनिष पी निरौला, प्रमित प्रसाई र प्रनि प्रान्जल पौडेललाई देख्न सकिन्छ। विभिन्न कारण आश्रम पुगेका बुवाआमा र उनीहरूका सन्तानको कथा फिल्मले उठान गरेको छ। 'यस डकुमेन्ट्री शर्ट फिल्मले बा–आमा अलपत्र पारेर हराएका सन्तान र समग्र परिवारको हृदयविदारक कथा बताउँछ,' ज्ञवालीले भने।
ज्ञवालीका यसअघि पनि सामाजिक विषयवस्तुसँग सम्बन्धित थुप्रै सर्ट फिल्महरु रिलिज भइसकेका छन्। पछिल्लो समय नेपालमा वैदेशिक रोजगारी र नेपालमा देखिएको आर्थिक संकटका कारण गाउँमा परेको प्रभाव र युवाहरु विदेशिँदै जाँदाको प्रभाव समेटिएको रित्तो गाउँ पनि ज्ञवालीले नै निर्देशन गरेका हुन्।
हालको समयको सबैभन्दा ठूलो स्वास्थ्य चुनौतीको विषयमा "साइलेन्स टुर" नामक डकुमेन्ट्री सर्ट फिल्म निर्माण गर्न लागेको ज्ञवालीले जानकारी दिए। यस हप्तादेखि नै यसको छायांकन सुरु गर्ने योजना रहेको उनको भनाइ छ। लामो समय पत्रकारितामा बिताएपछि केही वर्षदेखि उनी साना तर अर्थपूर्ण प्रोजेक्टहरूमा क्रियाशील छन्।
‘म सधैं विश्वास गर्छु, कुनै पनि ठूलो प्रोजेक्ट सुरु गर्नुभन्दा पहिले पर्याप्त अध्ययन र तयारी गर्न आवश्यक छ। मेरा धेरै शुभचिन्तकहरूले मलाई ठूला फिल्महरू निर्देशन गर्न सुझाउनु हुन्छ, तर मेरो सोचाइ भने केही सिकाई र परिपक्वता हासिल गरेपछि मात्रै त्यस दिशामा अघि बढ्ने हो’, उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1789631269.jpg)
