काठमाडौँ- एसिड आक्रमणमा गम्भीर घाइते भई उपचारकै क्रममा रहेकी राष्ट्रिय स्वतन्त्र पार्टी (रास्वपा)की सांसद विन्दबासिनी कंसाकारले मन्त्रालय लगायत निकायबाट तदारुकता काम नहुँदा क्षतिपूर्ति बापत पाउनुपर्ने रकम प्राप्तिमा ढिलाइ भएको गुनासो गरेकी छन्।
प्रतिनिधि सभा, महिला तथा सामाजिक मामिला समितिको सोमबारको बैठकमा सांसद स्वयंले आफू पीडित भएको घटनाको विवरण सुनाउँदै राज्यले पीडितलाई न्याय दिनुपर्नेमा सांसद भएबापत प्राप्त गर्नुपर्ने भत्ता समेत रोकिएको गुनासो गरिन्।
उनी विसं २०७० वैशाखमा तेजाब आक्रमणमा परेकी थिइन्। तेजाब आक्रमणपछिको जलन जस्तै उपचारका क्रममा भोग्नु परेको पीडा उस्तै रहेको पनि उनले बैठकमा सुनाइन्। उनले उपचारका क्रममा पिताका नाममा रहेको घर धितोमा राखेर ऋण लिन परेको र त्यो ऋण तिर्न नसक्दा कालोसूचीमा राखेकाले आफूले संसद्बाट प्राप्त गर्नुपर्ने सुविधा समेत रोकिएको वास्तविकता सुनाइन्।
तेजाब वा अरू जलनबाट हुने उपचार पद्धति निकै कमजोर रहेको जनाउँदै सांसद कंसाकारले ६ वर्षको उपचार बापतको खर्च रु एक करोड १४ लाख र पीडित राहत कोषबाट प्राप्त गर्ने प्रावधान अनुरुप अदालतबाट पाँच वर्षअघि फैसला भए पनि रकम अझैसम्म नपाएको गुनासो गरिन्।
अपराधमा संलग्न व्यक्तिलाई पक्राउ गर्ने मामिलामा समेत प्रहरी/प्रशासनबाट आवश्यक तदारुकता नभएका कारण लामो समयसम्म मानसिक रुपमा थप तनाव झेल्न परेको घटना उनले समितिलाई जानकारी गराइन्।
‘माननीय’लाई समेत न्याय पाउन यति कठिन छ भने अरूको के हालत होला भनी प्रश्न गर्दै समिति सदस्य कंसाकारले मैले न्याय पाइनँ भने राज्यले अरूलाई न्याय दिलाउँछ भनी विश्वास नै गर्न नसकिने बताइन्।
बैठकमा पीडित सांसद कंसाकारले तीन तहकै सरकारबाट पीडितलाई आर्थिक सहयोग गर्न सक्ने व्यवस्था भए पनि आफूले कसैबाट सहयोग नपाएको जानकारी गराइन्।
बैठकमा समितिका अरु सदस्यहरुले अदालतको फैसला कार्यान्वयन नहुने र पीडितले न्याय नपाउने हो भने कानुन बनाउनुको कुनै औचित्य नरहने प्रतिक्रिया दिएका थिए।
सर्वोच्च अदालतका रजिष्ट्रार एवं पीडित राहत कोषका अध्यक्ष विमल पौडेलले अपराधको कसुरका आधारमा क्षतिपूर्ति प्राप्त गर्ने कानुनी व्यवस्था रहेको बताए। उनले भने, ‘कानुनमा कसुरदारबाट क्षतिपूर्ति भराउनुपर्छ भन्ने छ। अदालतबाट ६ वर्षको अवधिमा औषधि उपचारका लागि खर्च भएको रकम भराउने निर्णय भएको छ। फैसला परेको केही शब्दको प्रयोगबारे स्पष्ट हुने क्रममा केही समय लागेको हो। अब छिट्टै यो विषय अघि बढ्छ।’
-रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
