काठमाडौँ- उपप्रधानमन्त्री एवं गृहमन्त्री रवि लामिछानेले मनसुन पूर्वतयारी तथा प्रतिकार्य कार्ययोजना, २०८१ ले निर्देश गरेअनुसार विपद्बाट हुने जनधनको क्षति घटाउने गरी कार्य गर्ने प्रतिबद्धता जनाएका छन्।
उनले नागरिकले आपत्-विपद्मा नै राज्यको सहयोगको अपेक्षा गर्ने भएकाले सोही अनुसार नीतिगत एवं व्यवस्थापकीय तयारी गरिने पनि बताए। सोमबार सिंहदरबारमा भएका विपद्सम्बन्धी छलफलमा उनले ‘टास्क फोर्स’ बनाएरै सरकारले विपद्मा परेकाको उद्धार, राहत तथा पुनःस्थापनका लागि काम गर्ने जानकारी दिए।
प्राधिकरणको नेतृत्वमा तयार भएको कार्ययोजनामाथि भएको उक्त छलफलमा सरोकारवाला तथा सुरक्षा निकायका प्रमुख, विज्ञहरु, सङ्घ संस्थाका प्रतिनिधिहरु, अभियानकर्मीहरुको सहभागिता थियो।
कार्ययोजनामा यस वर्ष हुनसक्ने मनसुन तथा जोखिमको आकलन, तत्कालै गर्नुपर्ने कार्यहरु, विषयगत क्षेत्रका जिम्मेवारी, विद्यमान साधन स्रोत र संरचनात्मक व्यवस्था लगायत विषय समावेश छन्।
विपद् जोखिम न्यूनीकरण तथा व्यवस्थापन कार्यकारी समितिको २०८१ वैशाख ३ गते बसेको २१औँ बैठकले कार्ययोजना तर्जुमा गर्न प्राधिकरणका सहसचिव भरतमणि पाण्डेको संयोजकत्वमा कार्यदल गठन गरेको थियो। सो क्रममा नेपाल प्रहरीका महानिरीक्षक वसन्तबहादुर कुँवर र सशस्त्र प्रहरीका महानिरीक्षक राजु अर्यालले सिमित स्रोत-साधनका बीच उद्धार कार्यमा प्रहरी कर्मचारी अहोरात्र खटिँदै आएको जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
