काठमाडौं– प्रमुख प्रतिपक्ष नेपाली कांग्रेसले सरकार आफैं संसद पनि चल्न नदिने र संसदीय छानबिन समिति बन्न नदिनेतर्फ उद्धत भएको निष्कर्ष निकालेको छ।
शनिबार पार्टी सभापति शेरबहादुर देउवाको निवास बुढानिलकण्ठमा बसेको पार्टी पदाधिकारी तथा पूर्वपदाधिकारी बैठकमा कांग्रेस नेताहरुले सो निष्कर्ष निकालेका हुन्। बैठकले अब संसदमा कसरी अघि बढ्ने भन्ने विषयमा छलफल गर्न आगामी वैशाख ३१ गते (सोमबार) अपरान्ह १ बजे पार्टी संसदीय दलको बैठक बोलाउने निर्णय पनि गरेको छ।
सरकारले संसद पनि चल्न नदिने र उपप्रधानमन्त्रीमाथि छानविनका लागि संसदीय समिति पनि बन्न नदिने रवैया बिरुद्ध कसरी प्रस्तुत हुने भन्ने विषयमा छलफल गर्न सोमबार पार्टी संसदीय दलको बैठक बोलाउने निर्णय गरिएको पार्टीका महामन्त्री गगनकुमार थापाले जानकारी दिए।
बैठकमा नेताहरुले उपप्रधानमन्त्री लामिछानेको सहकारी ठगी प्रकरणको लागि छानविन समिति नबनेसम्म संसद बैठक चल्न नदिने अडान राखेका थिए।
महामन्त्री थापाले भने, ‘पार्टी सभापति, पदाधिकारी र पूर्वपदाधिकारी बैठकमा अहिलेको संसदमा भईरहेको गतिरोध अरु विभिन्न विषयहरुको बारेमा हामीले छलफल गर्यौं। र हिजो संसदमा हामीहरुले सभामुखसँग पनि र अन्य दलहरुसँग पनि छलफल गरेर संसदको गतिरोध पनि अन्त्य होस्। हाम्रो माग पनि सम्बोधन होस भनेर एउटा सदासहायता, लचकता राख्दाराख्दै पनि सरकारले जुन खालको रवैया प्रश्तुत गर्यो। र सम्माननीय सभामुखले पनि जसरी संसदको अवरोध अन्त्य गर्नका निम्ति अझ बढी संवेदनशील हुनुपर्ने हो। र प्रतिपक्ष दलले त्यत्रो सदासहायता राख्दा पनि त्यसको नजरअन्दाज गर्ने स्थिति भयो। त्यो हाम्रो लागि अप्रत्याशित पनि भयो। र हामी चाहिने भन्दा बढी लचकदार भइरहेका छौं। हामीले लामो समयदेखि भनिराखेको गृहमन्त्रीजीले बोल्न पाउनुपर्छ भनेपछि उहाँले बोल्नु पाउनुपर्छ। उहाँले बोलेको कुरा सुन्ने भन्दैगर्दा जब्बरजस्ती कार्यसूचिमा प्रवेश गराउने काम भयो। यो सबै कुराले जसरी भएपनि यो संसद पनि चल्न नदिने, छानविन समिति पनि बनाउन नदिनेतर्फ नै सरकार उद्धत भएको भन्ने हाम्रो छलफलको आज निष्कर्ष जस्तो सबैको त्यो रह्यो। अब संसदमा कसरी जाने भन्ने विषयको सन्दर्भमा संसदीय दलको बैठक नै बोलाउनुपर्छ भन्ने सोचाईका साथ अब हामीले पर्सी १ बजेका लागि संसदीय दलको बैठक बोलाएका छौं। र संसदीय दलको बैठकबाटै अब हाम्रो जे माग हो, जे पोजिसन हो, त्यो त तलमाथि हुने कुरै भएन। तर संसद भित्र आफूलाई कसरी प्रश्तुत गरेर लिएर जाने अब सरकारको यो रवैया रहिसकेपछि अब यसलाई कसरी थप सशक्त बनाएर लिएर जाने भन्ने सन्दर्भमा चाहीँ संसदीय दलको बैठक बोलाएर नै पर्सी कुराकानी गर्ने भन्ने कुरा भयो एउटा। यही सन्दर्भमा यहाँ भित्र छलफल पनि भएको र मैले सरकारलाई अनुरोध पनि गर्न चाहेको सरकार र प्रतिपक्ष दलबीच संसदीय समिति बनाउने कि नबनाउने भन्ने एउटा विषयमा हाम्रो माग सरकारको पेलाई संघर्ष चलिरहेको छ। म सम्माननीय प्रधानमन्त्रीज्युलाई के ध्यानाकर्षण गराउन चाहन्छु भने यो हामीले सहकारी भनेका छौं। करोडौंको ठगी भनेका छौं।’
नेपाली कांग्रेसले शुक्रबार बसेको बैठकमा आफ्नो पार्टीलाई पेल्ने खालको भूमिका निर्वाह गरेको भन्दै सभामुख देवराज घिमिरेको पनि आलोचना गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778155080.jpg)
-1764146706.png)
