काठमाडौं- कर्णाली प्रदेशका मुख्यमन्त्री यामलाल कँडेलले विश्वासको मत पाएका छन्। बिहीबार प्रदेश सभामा कँडेलले प्रस्तुत गरेको विश्वासको मत लिने प्रस्ताव बहुमतले पारित भएको हो।
सभामुख नन्दा गुरूङले प्रस्तावको पक्षमा २३ मत, प्रस्तावको विपक्षमा १२ मत र तटस्थमा १ मत परेको बताइन्। बिहीबारको मतदानमा ३५ प्रदेश सभा सदस्य सहभागी थिए।
विश्वासको मत माग्ने प्रस्ताव प्रदेश सभामा प्रस्तुत गर्दै मुख्यमन्त्री कँडेलले कर्णाली प्रदेश सभाको स्थापनाकालदेखि निरन्तर एउटा जनप्रतिनिधिका हिसाबले भूमिका निर्वाह गर्ने अवसर जनताले प्रदान गरेको अवस्थालाई आफूले राम्रोसँग महसुस गरिरहेको बताए।
'प्रदेश सभाभित्र भूमिकाका हिसाबले, स्थानका हिसाबले, जुन ठाउँमा रहेको भए पनि यो सभाभित्र व्यक्त गरेका विचार र भनाइलाई नै सरकारको नेतृत्वमा रहेर त्यस अनुसारको कर्णालीको समृद्धि र विकासको यात्रालाई अगाडि बढाउने कुरा नै एक मात्र मेरो उद्देश्य हो', उनले भने।
कँडेलले त्यो उद्देश्य एकल प्रयास र एकल यात्राले सम्भव नभएको पनि बताए। 'त्यो सामूहिक प्रयास र सामूहिक यात्राले मात्रै प्राकृतिक साधन र स्रोतले भरिपूर्ण तर पूर्वाधार विकास र निर्माणका हिसाबले अहिले पनि कतिपय सूचांकमा नकारात्मक रहिरहेको प्रदेशलाई समृद्धि प्रदेश निर्माण गर्ने जुन अभिभारा छ। त्यतिबेला मात्रै पूरा हुन सक्छ', उनले भने।
उनले अर्को आर्थिक वर्ष सुरु नहुँदासम्म विगतको सरकारले ल्याएकै नीति तथा कार्यक्रमले निरन्तरता पाउने बताए। 'त्यस अनुसार नै हामी अगाडि बढ्छौँ', उनले भने, 'जसअनुसार प्रदेश सभाभित्र छलफल भएका, सहमति भएका, सल्लाह भएका निर्णय मुताबिक नै वर्तमान सरकार अगाडि बढ्ने कुरामा कुनै द्विविधा छैन। कुनै आशंका छैन।'
कँडेलले प्रस्तुत गरेको विश्वासको मत लिने प्रस्तावमाथिको छलफलमा बोल्दै कांग्रेसका प्रमुख सचेतक हिक्मतबहादुर बिष्टले प्रस्तावको विपक्षमा मतदान गर्ने बताए। त्यस्तै माओवादी केन्द्रका संसदीय दलका नेता तथा पूर्वमुख्यमन्त्री राजकुमार शर्माले विश्वासको मत दिने भनेर आफ्नो दलले निर्णय गरिसकेको बताए। उनले मुख्यमन्त्रीको कार्यकालको सफलताको कामना पनि गरे।
मुख्यमन्त्रीकै दल एमालेका टेकराज पछाईले अन्य दललाई पनि मुख्यमन्त्रीलाई विश्वासको मत दिन आग्रह गरे। राप्रपाकी सन्तोषी शाहीले आफ्नो दल तटस्थ रहने जानकारी गराइन्। नेकपा एकीकृत समाजवादीकी कल्याणी खड्काले आफ्नो पार्टीले मुख्यमन्त्रीलाई विश्वासको मत दिने बताए।
छलफलका क्रममा उठेका प्रश्नहरूको जवाफ दिने क्रममा मुख्यमन्त्री कँडेलले सबै दललाई आफूलाई विश्वासको मत दिन आग्रह गरे।
उनले कर्णालीको समृद्धि र विकासका निम्ति आफूहरूसँग असहमत रहनेहरूसँग पनि सहकार्य गरेर जाने बताए। 'आज मत नदिए पनि कर्णालीको विकास र निर्माणका सन्दर्भमा उत्तिकै प्राथमिकताका साथ संवाद र छलफललाई निरन्तर रुपले अगाडि बढाइने छ', उनले भने।
कँडेल गत चैत २८ गते मुख्यमन्त्री नियुक्त भएका थिए। त्यस दिन एक्लै सपथ लिएका उनले बुधबार मात्रै एक जना बिना विभागीय मन्त्री नियुक्त गरेका थिए। विश्वासको मत लिइसकेपछि मन्त्रिपरिषद्लाई पूर्णता दिने उनको तयारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
