काठमाडौं– भन्सार विभागले भन्सारमा लैङ्गिक समानता तथा सामाजिक समावेशिता सम्बन्धी राष्ट्रिय कार्यशाला कार्यक्रम आयोजना गरेको छ।
भन्सार सुधार तथा आधुनिकीकरण योजनाको क्रियाकलाप १.११ मा उल्लेखित भन्सारमा लैङ्गिक समानता र सामाजिक समावेशिता सिद्धान्त र मूल्य अवलम्बन गर्ने विषयलाई कार्यान्वयन गर्न बुधवार विभागले कार्यक्रमको आयोजना गरेको हो।
भन्सार सुधार तथा आधुनिकीकरण योजनाको क्रियाकलाप १.११ मा उल्लेखित ‘भन्सारमा लैङ्गिक समानता र सामाजिक समावेशिता ‘जेसी सिद्धान्त र मूल्य अवलम्बन गर्ने’ विषयलाई कार्यान्वयन गर्न विभागको आर्थिक वर्ष २०८०/८१ को स्वीकृत वार्षिक कार्यक्रममा यसलाई राखिएको छ।
उक्र कार्ययोजना बनाइ लागू गर्ने सम्बन्धमा भन्सार विभागले यही फागुन ०८ गते निर्णय गरेको विभागले जनाएको थियो। उक्त कार्ययोजना लागू गर्नुअघि बृहत छलफल गर्नुपर्ने भन्सार विभागका महानिर्देशक शोभाकान्त पौडेलले बताए।
‘नेपालको भन्सारले प्रतिबद्धता गरे अनुसार लैङ्गिक समानताको विषय कसरी काम गर्न सकिन्छ भनेर काम गरिरहेको छ। यसलाई लागू गर्नु अगाडि बृहत् छलफलको लागि यो कार्यक्रम आयोजना गरिएको हो,’ उनले भने।
भन्सार विभागको भन्सार सुधार तथा अन्तर्राष्ट्रिय सम्बन्ध शाखाका निर्देशक हरिहर पौडेलले भन्सारमै काम गर्ने महिलाहरूको संख्या न्यून रहेको बताए।
‘भन्सारमा महिलाको सहभागिता कम छ। यसमध्ये पनि केहीले लाइसेन्स मात्र लिनु भएको छ, भन्सारमा काम गर्ने महिलाहरूको संख्या बढाउन आवश्यक छ,’ उनले भने।
त्यस्तै, उनले आर्थिक वर्ष २०७८/७९–२०८२/८३ भित्रमा भन्सार सुधार तथा आधुनिकीकरण योजना भित्र लैङ्गिक समानता र सामाजिक समावेशितासम्बन्धी तयार कार्ययोजना लागू गरिने प्रतिबद्धता जनाए।
कार्यक्रममा राज्यले प्रदान गर्ने सेवा सुविधाहरूमा धेरै महिलाहरूको पहुँच नपुगेको हुनाले यस कार्ययोजनामा बराबर समेटेर मात्रै कार्यान्वयन गर्नुपर्नेमा जोड दिइएको छ। नीति बनाउने बेलामा चर्चा भए पनि कार्यान्वयन पक्ष भने फितलो रहेको सहभागीहरूले गुनासो गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
