काठमाडौं - एनसेलले पुरानो प्रविधिलाई विस्थापित गर्दै आधुनिक तथा उन्नत प्रविधिको प्रयोग विस्तार गर्ने उद्देश्यसहित थ्रीजी सेवा पूर्ण रूपमा बन्द गर्ने प्रक्रिया अन्तिम चरणमा पुर्याएको छ। कम्पनीले बाँकी रहेका ६८ प्रतिशत थ्रीजी साइट पनि एक महिनाभित्रै बन्द गर्ने योजनाको कार्यान्वयन सुरु गरेको छ।
एनसेलका कुल ३ हजार १२९ वटा थ्रीजी साइटमध्ये हालसम्म ९९२ वटा साइट बन्द भइसकेका छन्। अब कम्पनीले बाँकी रहेका २ हजार १३७ वटा साइटमा समेत थ्रीजी सेवा बन्द गर्ने एनसेलले जनाएको छ ।
थ्रीजी सेवा चरणबद्ध रूपमा बन्द गर्ने रणनीतिअनुरूप एनसेलले यसलाई चार चरणमा कार्यान्वयन गर्दैछ। पहिलो चरणमा मंसिर ७ गते लुम्बिनी र गण्डकी प्रदेशका थ्रीजी साइट बन्द गरिनेछन्। दोस्रो चरणमा मंसिर १४ गते काठमाडौं, ललितपुर र भक्तपुरका साइट बन्द गरिने एनसेलले जनाएको छ ।
त्यसैगरी, तेस्रो चरणमा मंसिर २१ गते मधेश र गण्डकी प्रदेशका बाँकी विभिन्न स्थानका साथै चितवनमा थ्रीजी सेवा बन्द गरिनेछ। चौथो तथा अन्तिम चरणमा मंसिर २६ गते मधेश र कोशी प्रदेशका विभिन्न स्थानमा बाँकी रहेका सबै थ्रीजी साइट बन्द गरिनेछन्।
२०७४ सालमा सुरु भएको एनसेलको थ्रीजी सेवा आगामी पुस २ गतेदेखि पूर्ण रूपमा बन्द हुनेछ। यससँगै ग्राहकले फोरजीमा आधारित भ्वाइस ओभर लङ टर्म इभोलुसन (भोल्टे) प्रविधिमार्फत अझ स्पष्ट तथा उच्च गुणस्तरको भ्वाइस कल र छिटो कल कनेक्सनको अनुभव गर्न सक्ने एनसेलले जनाएको छ ।
भोल्टे प्रविधिबाट ग्राहकले भ्वाइस कल गर्दै एकै समयमा फोरजी डेटा पनि प्रयोग गर्न सक्नेछन्। भोल्टे सेवा प्रयोग गर्न ग्राहकसँग फोरजी सिमका साथै उक्त सेवा सञ्चालन गर्न मिल्ने मोबाइल फोन हुनुपर्नेछ।
एनसेलकी नेटवर्क प्रमुख लेना केशरी कंसाकारले पुरानो प्रविधिको सट्टा नयाँ, छिटो र प्रभावकारी प्रविधिमा रूपान्तरण गर्ने तथा पुराना प्रणालीको सञ्चालन र मर्मतसम्भार लागत घटाउने योजनाअनुसार यो निर्णय लिइएको बताइन्।
उनले भनिन्, “थ्रीजी सेवा बन्द गर्ने यो प्रक्रियाले हाम्रा बाँकी ग्राहकलाई फोरजी प्रविधिमा आधारित सेवाहरूमा अपग्रेड हुने अवसर प्रदान गर्दछ। थ्रीजी सेवा बन्द भएपछि हामी भोल्टेसहितको फोरजी नेटवर्कलाई थप सुदृढ बनाउन र भविष्यमा फाइभजी प्रविधिका लागि तयार हुन सक्षम हुनेछौँ।”
उनले थपिन्, “थ्रीजी सेवा बन्द गर्ने क्रममा यसबाट कुनै पनि ग्राहक डिजिटल डिभाइडको जोखिममा नपरून् भन्नेमा एनसेल सचेत छ। फोरजीमा अपग्रेड हुन बाँकी रहेका ग्राहकले पनि टुजी नेटवर्कमार्फत आधारभूत अत्यावश्यक दूरसञ्चार सेवाहरू निरन्तर प्रयोग गर्न सक्ने व्यवस्था सुनिश्चित गर्नेछौँ।”
यस कदमले एनसेलको सेवा गुणस्तर थप सुधार गर्न, फोरजी नेटवर्कको क्षमता अभिवृद्धि गर्न र सञ्चालन खर्च घटाउन सहयोग पुग्ने अपेक्षा गरिएको छ। साथै, यसले कम्पनीलाई भविष्यमा फाइभजी प्रविधि भित्र्याउन आवश्यक तयारी गर्न पनि मद्दत गर्नेछ।
थ्रीजी सेवा बन्द भएपछि उपलब्ध हुने फ्रिक्वेन्सीलाई फोरजी सेवा थप सुदृढ बनाउन, नेटवर्क क्षमता बढाउन र कनेक्टिभिटी सुधार गर्न पुनः प्रयोग गरिने एनसेलले जनाएको छ।
हाल थ्रीजी सेवा प्रयोग गरिरहेका ग्राहक आधारभूत दूरसञ्चार सेवाबाट वञ्चित नहून् भन्ने सुनिश्चित गर्न एनसेलले आफ्नो टुजी नेटवर्क उपलब्ध गराउने स्पष्ट पारेको छ। टुजी नेटवर्कमार्फत ग्राहकले आधारभूत भ्वाइस कल र एसएमएस सेवा प्रयोग गर्न सक्नेछन्।
एनसेलको फोरजी सेवा यसअघि नै नेपालको करिब ९५ प्रतिशत जनसंख्यामा विस्तार भइसकेको छ। यो प्रविधिले ग्राहकलाई आधुनिक मोबाइल कनेक्टिभिटीको पहुँच सुनिश्चित गर्ने कम्पनीको भनाइ छ।
हाल एनसेलका कुल सक्रिय ग्राहकहरूमध्ये करिब ५ प्रतिशतले अझै फोरजी सिम प्रयोग गरिरहेका छैनन्। थ्रीजी सेवा बन्द हुने क्रममा ग्राहकलाई पर्न सक्ने असुविधा न्यूनीकरण गर्न कम्पनीले अझै थ्रीजी सिम प्रयोग गरिरहेका ग्राहकलाई निःशुल्क फोरजी सिम उपलब्ध गराउँदै आएको छ।
ग्राहकले नजिकैको एनसेल सेन्टर वा प्वाइन्ट अफ सेल्समा गएर आफ्नो सिमलाई फोरजीमा अपग्रेड गर्न सक्छन्। फोरजी सिम लिँदा ग्राहकले सात दिनको समयसीमा भएको २ जीबी डेटा पनि निःशुल्क प्राप्त गर्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।