काठमाडौं- सत्तारुढ नेकपा (माओवादी केन्द्र) का प्रवक्ता अग्निप्रसाद सापकोटाले नेपाली जनताले गणतन्त्रको विकल्प नखोजेको दाबी गरेका छन्। आइतबार पार्टी केन्द्रीय कार्यालय पेरिसडाँडामा आयोजित पार्टी स्थायी समिति बैठकपछि सञ्चारकर्मीमाझ उनले यस्तो दाबी गरेका हुन्।
प्रवक्ता सापकोटाले विश्वकै लागि मोडेलको रुपमा रहेको संघीयता, गणतन्त्र र धर्म निरपेक्षताको विकल्प नेपाली जनताले नखोजेको दाबी गर्दै त्यसलाई अझ बढी उन्नत ढंगले अघि बढाउनुपर्ने आवश्यकता औंल्याए।
उनले सामाजिक न्याय सहितको सुशासन र समृद्धि नेपाली जनताको अहिलेको अपेक्षा रहेको उल्लेख गर्दै सोही अनुसार अघि बढ्न परिवर्तनका पक्षधर राजनीतिक शक्तिहरु एक ठाउँमा आउनुपर्ने बताए। उनले भने, ‘संघीय लोकतान्त्रिक गणतन्त्रलाई धुमिल बनाउने कुनै पनि दुष्प्रयासहरु सफल हुने छैनन्।’
धेरै ठूलो कुर्वानी गरेर ल्याएको गणतन्त्र, धर्मनिरपेक्षता, संघीयता, समानुपातिक समावेशी सिद्धान्त कसैले सजिलै समाप्त गर्न नसक्ने उनको भनाइ थियो। ‘नेपालको गणतन्त्र राष्ट्रका लागि मात्रै नभई विश्वकै लागि एउटा मोडेल हो। यसलाई धुमिल पार्न, ओझेलमा पार्न, पछाडि फर्काउन दुष्प्रयासहरु भइरहेका छन्। यो इतिहासको चक्का पछाडि फर्कन सक्दैन,’ सापकोटाले भने।
प्रवक्ता सापकोटाले मुलुकलाई अग्रगामी बाटोमा अघि बढाउन अग्रमगनका पक्षधर शक्तिहरुबीच सहकार्यका साथ अघि बढ्नुको विकल्प नरहेको पनि बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
