मनहरी- बागमती प्रदेशमा संसद् सञ्चालनका लागि सभामुख भुवनकुमार पाठकले सर्वदलीय बैठक बोलाएका छन्। प्रदेश सभा बैठक सञ्चालनका सन्दर्भमा दलबीच सहमति गर्न प्रदेश सभा सचिवालय हेटौँडाले सर्वदलीय बैठक आइतबार बोलाएको हो। बैठक प्रदेशसभा सचिवालयमा नै बस्ने जनाइएको छ।
प्रदेश सभाका सबै दलबीच सहमति गर्ने उद्देश्यअनुसार सर्वदलीय बैठक बस्न लागेको हो। प्रदेश सभा सञ्चालन, संसद्को कार्यसूची, संसद्को विजनेस लगायत विषयमा निर्णय गर्न सभामुख पाठकले सर्वदलीय बैठक आह्वान गरेका हुन्।
प्रदेश सभा सचिवालय हेटौँडाका प्रवक्ता मनोजकुमार गुप्ताका अनुसार सर्वदलीय बैठकमा निर्णय नभएका खण्डमा प्रदेश सभाको आगामी फागुन १५ गते आह्वान गरिएको बैठकले निरन्तरता पाउन सक्ने छैन। संसद्मा पर्याप्त विजनेस नरहेको र नयाँ विधेयक पनि दर्ता नभएको अवस्थामा सदनको व्यवस्थापन, कार्यसूची र मापदण्ड निर्माण गरी सबै दलको सहमति जुटाएर अघि बढ्ने तयारी रहेको उनले बताँए।
विशेषतः संसद्मा नयाँ विधेयक दर्ता गर्ने, संसद् बैठकको व्यवस्थापन, कार्यसूची लगायतका विषयमा सहमति गर्नुपर्ने उनको भनाइ छ। हाल तीन वटा विधेयक विभिन्न समितिमा विचाराधीन अवस्थामा रहेको छ भने एउटा सचिवालयमा दर्ता भएको उनले जानकारी दिए। सर्वदलीय बैठकमा सहमति नबनेका खण्डमा सो विधेयक अघि बढ्न नसक्ने र समितिका बैठक पनि सञ्चालन नहुने प्रवक्ता गुप्ताले बताए।
विगत चार महिनादेखि प्रदेश सभा बैठक बस्न सकेको छैन भने संसद् नबस्दा संसदीय समितिको नेतृत्व चयन, कानुन निर्माण लगायत विषय अघि बढ्न सकेको छैन। गत असोज २२ गतेदेखि प्रदेश सभा बैठक बस्न सकेको छैन। असोज २२ गते संसद्को वर्षे (बजेट) अधिवेशन अन्त्य गरिएको चार महिना पूरा भइसकेको छ।
प्रदेश प्रमुख यादवचन्द्र शर्माले फागुन १५ गते ३ बजेका लागि प्रदेश सभा बैठकको हिउँदे अधिवेशन आह्वान गरेका छन्। प्रदेश प्रमुख शर्माले बागमती प्रदेश सरकारको मन्त्रिपरिषद्को सिफारिसमा नेपालको संविधानको धारा १८३ उपधारा १ बमोजिम प्रदेश सभाको तेह्रौँ अधिवेशन बोलाएका हुन्।
- रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
