काठमाडौं- लोकतान्त्रिक समाजवादी पार्टीका महासचिव केशव झाले अध्यक्ष महन्थ ठाकुरलाई एक पत्र पठाउँदै १६ वर्ष मधेशको नेतृत्व गरेको सन्दर्भमा श्वेतपत्र जारी गर्न आग्रह गरेका छन्।
झाले कांग्रेस परित्याग गरेर मधेश राजनीतिमा होमिँदा ठाकुरले ‘बाँचे भने मधेशमा शासन सत्ता सञ्चालन गर्छु नभए वीरगति प्राप्त गरेर स्वर्गको बास बस्छु’ भनेको स्मरण गराउँदै सोधेका छन्- ‘आज १६ वर्ष भयो, मधेशको नेतृत्व यहाँले गरिराख्नु भएको छ। स्वमुल्याङ्कन गर्ने बेला भयो कि? निर्मम विश्लेषण गरेर संश्लेषित धारणा बनाउने कि अध्यक्ष ज्यू? तमलोपा देखि लोसपा सम्मको यात्रा तय गरिसक्दा कहाँनेर के चुक भयो? मधेशी जनतासामु श्वेतपत्र जारी गर्ने बेला भयो कि?’
झाले ठाकुरलाई गति बढाउनलाई गियर चेन्ज गर्ने बेला भएको सुझाव पनि दिएका छन्। तत्कालीन तराई मधेश लोकतान्त्रिक पार्टीको लिगेसिको उत्तराधिकारीलाई जिम्मा लगाएर आफू विश्राम लिन पनि भनेका छन्। ‘अभिभावकत्व ग्रहण गरेर मार्गदर्शन गर्ने हो कि? इतिहासले सधैं अवसर दिँदैन बेलैमा अवसर छोप्नु बुद्धिमानी होला अध्यक्ष ज्यू’, झाको पत्रमा उल्लेख छ।
जनतामा आएको निराशालाई आशामा बदल्ने प्रयत्न गर्नु उपयुक्त भएको र त्यसो नहुने हो भने लोसपा थप निष्प्राण हुँदै जाने र बिस्तारै सबैले छोडेर जाने बताएका छन्।
‘आफ्नै आमाबुवाको पनि शरीरबाट प्राण उडेपछि सन्तानले घरबाट निकालेर जलाई दिने वा गाड्ने गर्दछ, पार्टी त्यस्तो अवस्थामा पुग्दा के होला। सिमित व्यक्तिको अवसरवादको लागि क्रान्तिको दियो निभ्न नदिउँ अध्यक्ष ज्यू’, झाको पत्रमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
