काठमाडौं- प्रतिनिधि सभा बैठकमा सत्तापक्षका सांसद राजन केसीले प्रतिपक्षले विधेयकमा गणपुरक संख्या नपुगोस् भनी बाहिर निस्केको भनी आरोप लगाएपछि विवाद भएको छ। आकस्मिक समय चलिरहेको समयमा सत्तापक्ष नेपाली कांग्रेसका सांसद केसीलाई सभामुख देवराज घिमिरेले समय उपलबब्ध गराएका थिए।
सभामुखले समय उपलब्ध गराएसगै सांसद केसीले बिहीबार राजनीतिक दल सम्बन्धी विधेयक पेस हुँदा एमाले सहितका प्रमुख प्रतिपक्ष दलका सांसदहरु १५ जना बाहिर निस्केको अनि गणपुरक संख्या माग गरेको भन्दै विधेयक पास गर्ने कुरामा प्रतिपक्षले यस्तो भूमिका निभाउन नमिल्ने आरोप लगाए।
उनले यस्तो आरोप लगाए लगत्तै प्रतिपक्ष दलहरुले विरोध गर्न सुरु गरे। सभामुख घिमिरले सबैलाई समय दिने भन्दै पटकपटक आग्रह गरेपनि उनीहरुले नमानेपछि सत्तापक्षकै सांसद केसीलाई आफ्नो भनाइ सक्न सभामुख घिमिरेले आग्रह गरे। लगत्तै प्रतिपक्षहरुलाई सभामुखले बोल्ने समय दिए।
सुरुमै नेकपा एमालेका प्रमुख सचेतक पदम गिरीले बोल्दै संसद्मा दर्ता भएको विधेयक सत्तापक्षले पारित गर्नुपर्ने दायित्व लिनुपर्नेमा प्रतिपक्षमाथि आरोप लगाउनु गलत भएको दाबी गरे।
‘प्रतिपक्षमाथि हिलो छ्याप्ने काम भएको छ। प्रतिपक्षका कारण कहाँ विधेयकमा असर पर्यो। आफूले दर्ता गरेको विधेयक पास गर्ने नैतिकता सत्ता पक्षसँग छ कि छैन,’ उनले भने, ‘सत् पक्षका सांसदहरुलाई अगाडि ल्याएर प्रतिपक्षलाई हिलो छ्याप्ने काम गर्न पाइँदैन। प्रतिपक्षलाई विरोध गर्न आकास्मिक समय दिन मिल्दैन।’
त्यस्तै राष्ट्रिय स्वतन्त्र पार्टीका सासद विराजभक्त श्रेष्ठले संसद् चलाउने कुरा सत्तापक्षको भएकाले प्रतिपक्षलाई आरोप लगाउनु गलत भएको दाबी गरे। उनले पार्टी देशका लागि कि देश पार्टीका लागि भन्ने प्रश्न उठेको बताए।
‘संसद् चलाउने दायित्व सत्तापक्षको हो। प्रतिपक्षमा बसेर रचनात्मक सहयोग गर्ने हो। कार्य व्यवस्थामा महासमिति बैठक छ भनेर किन भनिएन,’ उनले भने, ‘विधेयकमा बहुमत पुर्याउन नसक्नेले कसरी सरकार चलाउन सक्छ। सरकारमा जवाफदेहिता भएन भनेर ध्यानाकर्षण गराउँदा संसद् चलेन भनेर आरोप लगाउन पाइन्छ?’
त्यस्तै राप्रपाका प्रमुख सचेतक ज्ञानेन्द्रबहादुर शाहीले संसद्मा किन झगडा भइरहेको भनी प्रश्न उठाए। ‘यो झगडा र लडाईं किन? क्यालेन्डर लागू भएको छ। कार्यव्यवस्था समिति छ। संसद्मा नआउने अनि विधेयक संसद्मा पेस नगर्ने अनि आरोप प्रतिपक्षलाई लगाउन मिल्छ?,’ उनले भने, ‘प्रधानमन्त्री आउने हो कि गृहमन्त्री आउने हो जवाफ नदिने हो भने संसद् चल्दैन। प्रतिपक्ष बोल्दै जाने सरकारले जवाफ नदिने हो भने किन चलाउने? संसद् रत्नपार्क र खुलामञ्च होइन। प्रधानमन्त्रीले संसद्मा बालकुमारी घटना हत्या हो भनेकाले हत्या गर्नेहरुलाई किन पक्राउ गरिएन?’
प्रमुख प्रतिपक्षलाई समय दिए लगत्तै सभामुख घिमिरेले सत्तापक्ष माओवादी केन्द्रका सांसद माधव सापकोटाले प्रतिपक्षले संख्याकै आधारमा सत्ता पक्षलाई पेल्न नमिल्ने दाबी गरे। उनले सभामुखले कसरी समय निर्धारण गर्नुभयो भनी प्रश्न गरे।
‘कुन नियमा टेकेर सभामुखले प्रतिपक्षलाई समय दिनुभयो। प्रतिपक्षले संख्या धेरै भएको भरमा सत्तापक्षलाई दबाउनु लोकतन्त्र हो? संसद् चलाउनु छैन र? अराजक हुन मिल्दैन,’ उनले भने, ‘संसद्मा महासचिवको तीन वटा नागरिकता र पासपोर्टको कुरा किन नउठाएको, विकृतिका कुरा उठाउने हो भने सबै उठाउनु पर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
