काठमाडौं– नेपाली कांग्रेसले गठबन्धन गर्दा उपलब्धि भए पनि असन्तुष्टि र चुनौतीसमेत बढेको निचोड निकालेको छ। कांग्रेस महामन्त्री विश्वप्रकाश शर्माले कांग्रेस केन्द्रीय समिति बैठकमा विधान अधिवेशनका लागि तयार ‘राजनीतिक प्रस्ताव’ मा गठबन्धनको समस्या ढाकछोप भन्दा समाधानतिर जानुपर्ने बताएका छन्। उनले यसरी ढाकछोप गर्दा सत्ता गठबन्धनमा संकट आउन सक्ने भन्दै यस्तो टिप्पणी गरेका थिए।
अघिल्लो प्रतिनिधि सभाको विघटनपछि संसद् र संविधानको रक्षाका लागि निर्मित गठबन्धनका मुख्य दलहरू गएको निर्वाचनमा एक भएर मैदानमा गएको स्मरण गर्दै शर्माले यसो गर्दा केही उपलब्धि भए पनि असन्तुष्टि र चुनौती पनि बढेको राजनीतिक प्रस्तावमा उल्लेख गरेका छन्।
‘पृष्ठभूमि र वैचारिक धार हाम्रो भिन्न थियो र छ, त्यसैले चुनावमा ‘प्री पोल एलायन्स’ हुनु सही या गलत भन्ने दुई थरी मतबीच हामी गठबन्धन गरेरै जाने संस्थागत निर्णयमा पुगेका थियौं’, शर्माले भनेका छन्, ‘त्यसबाट उपलब्धि हासिल भएको छ भने असन्तुष्टि र चुनौती पनि बढेका छन्।’
महामन्त्री शर्माले गठबन्धनबाट प्राप्त गणितको समीक्षामा ‘भोट ट्रान्सफर’ को विषय चुनौतीपूर्ण विषय रहे पनि ०७४ को निर्वाचनको तुलनामा नेपाली कांग्रेस पछिल्लो निर्वाचनमा तीन वटै तहमा पहिलो दलका रूपमा स्थापित हुनु गठबन्धनको महत्त्वपूर्ण योगदान रहेको बताएका छन्।
‘स्थानीय निर्वाचनमा ७५३ पालिका मध्ये १८८ गा.पा. अध्यक्ष र १४१ नगर/उपमहानगर र महानगर प्रमुखसहित ३२९ पालिकाको नेतृत्वमा कांग्रेस उम्मेदवार विजयी भए’, शर्माले आफ्नो तथ्य पेस गर्दै भनेका छन्, ‘प्रमुखतर्फ करिब ४४ प्रतिशत हो यो।’ त्यस्तै उनले ७५३ उपप्रमुखमध्ये नेपाली कांग्रेसका उम्मेदवार ३०० स्थानमा (१९० उपाध्यक्ष र ११० उपप्रमुख) विजयी भएको जुन कुल स्थानको ४० प्रतिशत हुने बताएका छन्।
शर्माले पाँच दलीय गठबन्धनमा रहेका दलहरूले स्वतन्त्र गतिविधि गर्न नपाएको बताएका छन्। पार्टीको फागुन ७ गतेदेखि सुरु हुन लागेको महासमिति बैठकका लागि तयार पारिएको राजनीतिक प्रतिवेदनमा शर्माले गठबन्धनबारे उक्त कुरा उल्लेख गरेका हुन्। शर्माले कोसी प्रदेशमा गत माघ ११ गते भएको राष्ट्रिय सभा निर्वाचनसहितका राजनीतिक घटनाक्रमलाई लिएर गठबन्धनका अन्य दलले कांग्रेसमाथि आरोप लगाइरहेका सन्दर्भमा यस्तो बताएका हुन्।
‘कोशी प्रदेशमा पछिल्लो पटक सरकार बनाउँदा र माघ ११ गतेको राष्ट्रिय सभा निर्वाचनमा माओवादी केन्द्रका उम्मेदवार पराजित हुँदा सहयात्री दलले हामीप्रति असन्तोष प्रकट गरेको स्थिति छ,’ उनले प्रतिवेदनमा भनेका छन्, ’यस घटनाक्रमलाई गम्भीर समीक्षासहित कमजोरी पहिचान गर्न र सहमतिको बाटोबाट निदानको उपाय पत्ता लगाउन जरुरी छ।’
महामन्त्री शर्माले कांग्रेस–माओवादी संयुक्त सरकार पाँचै वर्ष टिक्ने दाबी गरिरहेका बेला गठबन्धनमा देखिएको समस्यालाई ढाकछोप गरिँदा समस्या आउन सक्ने बताएका छन्। समस्याको सही निदान नभए गठबन्धनको भविष्यमै प्रश्न उठ्न सक्ने पनि शर्माले जनाएका छन्।
महामन्त्री शर्माले गठबन्धनबाट प्राप्त गणितको समीक्षामा ‘भोट ट्रान्सफर’ को विषय चुनौतीपूर्ण विषय रहे पनि ०७४ को निर्वाचनको तुलनामा नेपाली कांग्रेस पछिल्लो निर्वाचनमा तीन वटै तहमा पहिलो दलका रूपमा स्थापित हुनु गठबन्धनको महत्त्वपूर्ण योगदान रहेको बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
