काठमाडौं– सत्तारुढ दल नेपाली कांग्रेसका महामन्त्री एवम् सांसद गगन थापाले प्रधानमन्त्री पुष्पकमल दाहाल प्रचण्डलाई काम गर्ने तरिका बदल्न सुझाव दिएका छन्। प्रधानमन्त्रीले काम गर्ने तरिका नबदले परिणाम नआउने थापाको भनाइ छ।
बुधबार प्रतिनिधि सभाको बैठकमा बोल्दै थापाले पछिल्लो समय प्रधानमन्त्री प्रचण्डले दिँदै आएको निर्देशनप्रति संकेत गदै त्यसले मुलुकमा कुनै पनि समस्याको समाधान नहुने जिकिर गरे। निर्देशन मात्रै दिने, तर आफू स्वयंले भने काम गर्ने तरिका नबदल्ने हो भने फरक परिणामको अपेक्षा गर्ने कुरा मुर्खता शिवाय अरु केही नहुने थापाको भनाइ छ।
प्रधानमन्त्रीले कार्यालय प्रमुखले झैं देशको प्रमुखको रुपमा काम गरेर मात्रै मुलुकको समस्या पहिचान हुने र त्यसले समाधान पनि पाउने दाबी गरे। महामन्त्री थापाले तीन वटै तहको सरकारले निर्देशन दिने मात्रै काम गरेकाले जनताको अपेक्षाअनुसार काम हुन नसकेको पनि बताए।
मुलुकका समस्या समाधानका लागि प्रधानमन्त्री प्रचण्डले अतिरिक्त पहलकदमी लिनुपर्ने थापाको भनाइ छ।
थापाले भने, ‘अहिले लामो समयदेखि रोकिराखेका विषयमा काम गर्नुपर्छ भनेर प्रधानमन्त्रीले भनेको हामीले देख्यौं। तर छलफल गरीसके पछाडि आज छलफल भयो, मैले भनेको १० दिन, १५ दिन भित्र यति काम गर्ने भनेर निर्देशन दिएको पनि हामीले पढ्यौँ। योभन्दा अगाडिको प्रधानमन्त्रीले निर्देशन नदिएकाले अहिले मैले निर्देशन दिएकाले हुन्छ भन्ने सोचबाट बाहिर निस्कौं। निर्देशनले हाम्रो समस्या समाधान गर्दैन। प्रधानमन्त्रीले निर्देशन दिएको देखेपछि मन्त्रीले पनि निर्देशन दिने भए। मन्त्रीले दिएको देखेपछि संसदीय समितिले पनि निर्देशन दिने हो। सबैले सबैलाई निर्देशन दिने मात्रै हो। स्थानीय सरकारहरुको हालत यस्तै छ। प्रदेशको सरकारको हालत यस्तै छ। त्यसैले यहाँ भित्र हाम्रो समस्याको समाधान खोज्नका निम्ति अतिरिक्त पहलकदमी चाहिएको छ। त्यसैले म फेरि दोहोर्याएर भन्छु कि प्रधानमन्त्रीले त्यो सिंहदरबार भित्र प्रधानमन्त्रीको कुर्सीमा बसेर दिनको १० देखि ५ बजेको समय जसरी कुनै एउटा संस्थाको प्रमुखले संस्थाको नेतृत्व गरेको हुन्छ। दिनको निश्चित समय आफूले दिएको जिम्मेवारीभन्दा बाहेक अरु कुनै जिम्मेवारीको चिन्तन गर्दैन, सोच्दैन। त्यसैलाई पाथमिकता राख्छ, नेपालको प्रधानमन्त्रीले पनि त्यसरी नै काम गर्नुपर्छ। त्यसपछि मात्रै त्यो उपलब्ध भएको समयको बीचमा गरिने छलफलले समस्या पनि देखाउँछ, समस्याको पहिचान पनि हुन्छ। समाधान कसरी खोज्ने भन्ने कुरा पनि जान्छ। र त्यसैले हामीलाई टुंगोमा पनि पुर्याउँछ। काम गर्ने तरिका नबदलिकन फरक परिणाम आउँदैन। उही काम गरेर फरक परिणाम अपेक्षा गर्ने कुरा मुर्खता मात्रै हुन्छ। त्यसको शुरुवात स्वयं प्रधानमन्त्रीबाटै गरिनुपर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
