पहिचान सहितको संघीयताको नारा लिएर चुनावमा जाँदा जनताको साथ नपाउनु दुर्भाग्यपूर्णः प्रधानमन्त्री

राजनीति

नेपाल लाइभ आइतबार, माघ २१, २०८० १६:०४

काठमाडौं- प्रधानमन्त्री पुष्पकमल दाहाल प्रचण्डले पहिचान सहितको संघीयताको नारा लिएर चुनावमा जाँदा पनि जनताको साथ नपाउनु दुर्भाग्यपूर्ण रहेको बताएका छन्। आदिवासी जनजाति आयोगको तेस्रो वार्षिक स्थापना दिवसको अवसरमा काठमाडौंमा आयोजित कार्यक्रमलाई सम्बोधन गर्दै उनले यस्तो बताएका हुन्।

विसं २०७० सालको चुनावमा आफूहरु पहिचान सहितको संघीयता र संघीयता सहितको संविधान भन्ने मुल नारा लिएर निर्वाचनमा गएको भए पनि आदिवासी जनजातिकै साथ नपाएको उनको भनाइ थियो। उनले २०७० को निर्वाचन सकिएलगत्तै आदिवासी जनजातिकै स्थापित नेताले आफूसँग आदिवासी जनजाति नै पहिचान विरोधीलाई दिएको बताएको उल्लेख गरे।

प्रधानमन्त्री प्रचण्डले भने, ‘यो दोष आदिवासी जनजातिको नभई पहिचान र संघीयताको पक्षमा, समावेशी र समानुपातिकताको पक्षमा काम गर्ने पार्टी र नेतृत्वको कमीको परिणाम हो। पहिचानवादी पार्टी एकतावद्ध नरहनु, जनतालाई विश्वास दिलाउन नसक्नु आफूहरुको कमजोरी थियो।’

२०७० को चुनावको सन्दर्भमा आफूहरुले पहिचान सहितको संघीयता र संघीयता सहितको संविधान भन्ने मुल नारा लिएर निर्वाचनमा गए पनि त्यो नाराको पक्षमा जनमत नदेखिएको उनको भनाइ थियो। ‘हाम्रो नाराको विरुद्ध जनमत देखियो। यो बडो दुर्भाग्यपूर्ण कुरा हो भन्ने मलाई लाग्छ,’ प्रचण्डले भने।

निर्वाचन सकिए लगत्तै एक जना आदिवासी जनजातिकै स्थापित नेता आफूकहाँ आएको स्मरण गर्दै प्रचण्डले भने, ‘उहाँले भन्नुभयो- तपाईंहरुले पहिचान सहितको संघीयता, संघीयता सहितको संविधान भनेर नारा लगाउनु भयो। जनजातिले भोट जति सबै पहिचान विरोधीलाई हाले। मैले भनें- यो आदिवासी जनजातिको दोष होइन। पहिचान र संघीयताको पक्षमा, समावेशी र समानुपातिकताको पक्षमा काम गर्ने पार्टी र नेतृत्वको कमीको परिणाम हो।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

विपक्षी दलहरूले आज संयुक्त पत्रकार सम्मेलन गर्दै

नेपाल-भारत सीमास्तम्भको मर्मत सुरु

भल्कोटमा अझै जीवित छ सयौँ वर्ष पुरानो ‘पुतली नाच’