काठमाडौं– नक्कली कागजात बनाएर भिजिट भिसामा सेटिङमार्फत् विभिन्न मुलुकमा मान्छे पठाउने काममा संलग्न रहेको आरोपमा पक्राउ परेका अध्यागमन अधिकृत नरवीर खड्काले एउटै ट्राभल्सबाट १ करोड रुपैयाँ घुस बुझेको खुलेको छ।
प्रहरी अनुसन्धानका क्रममा त्रिभुवन अन्तर्राष्ट्रिय विमानस्थलको अध्यागमनमा कार्यरत खड्काले एउटै ट्राभल्सबाट १ करोड रुपैयाँ बुझेको भन्दै ट्राभल्सका कर्मचारीले बयान दिएका छन्। पक्राउ परेका हाल थुनामा रहेका खड्काले सिनामंगलमा रहेको निमा छिरिङ ट्राभल्सबाट मात्रै भिजिट भिसा सेटिङका लागि १ करोड रुपैयाँ बुझेको भन्दै उक्त ट्राभल्सका कर्मचारीले कागज गरिदिएका छन्।
काभ्रेको पाँचखाल–३ का मनोज लामाले सञ्चालन गरेको निमा छिरिङ ट्राभल्समा उनकै साला नाता पर्ने पदम लामाले काम गर्थे। उक्त ट्राभल्सका कर्मचारी पदमले अध्यागमन अधिकृत नरवीरले मात्रै १ करोड रुपैयाँ बुझेको बताएका छन्। पदमले भनेका छन्, ‘हालसम्म अध्यागमन अधिकृत नरवीरको सेटिङमार्फत ३०० जनालाई विदेश पठाइएको छ। त्यसबापत नरवीरलाई सेटिङका लागि १ करोड बुझाइसकेका छौँ।’
त्यसैगरी नरवीरले पुरुष र महिलाको छुट्टाछुट्टै दररेट तोकेर रकम लिने गरेको पनि पाइएको छ। पदमले भनेका छन्, ‘भिजिट भिसामा जाने व्यक्तिहरुको एयरपोर्टमा सेटिङ गरी मेरो भिनाजु मनोजले भनेअनुसार रकम दिने गरेको हो। अध्यागमन अधिकृत नरवीर खड्कालाई पुरुषका लागि प्रतिव्यक्ति १७ हजार र महिलाका लागि प्रतिव्यक्ति ५० हजारका दरले रकम दिने गरिएको थियो।’
नरवीरलाई मंसिर २६ गते काठमाडौं उपत्यका अपराध अनुसन्धान कार्यालयको टोलीले २ लाख रुपैयाँ घुस लिँदै गर्दा होटलबाटै पक्राउ गरेको थियो। उक्त रकम पनि निमा ट्राभल्सले नै दिएको थियो। पदमले आफ्नो बयानमा भनेका छन्, ‘मंसिर २६ गते दिउँसो होटल वाल्टिनको काउन्टरमा १ जना महिला स्टाफलाई नरवीर खड्कालाई २ लाख दिनु भनि छाडेको थिएँ।’ सोही रकम २ लाख घुस बुझ्दै गर्दा खड्का पक्राउ परेका थिए।
यतिमात्रै होइन नरवीर खड्का ट्राभल्समा आफैँ गएर रकम समेत उठाउने गर्थे। मंसिर ४ गते मात्रै उनले निमा ट्राभल्समा गएर त्यसका सञ्चालक मनोजसँग ३ लाख ५० हजार रुपैयाँ बुझेको समेत अनुसन्धानबाट खुलेको छ। पदमले बयानमा समेत भनेका छन्, ‘नरवीर खड्का सर कहिले हाम्रो अफिसमा आएर र कहिले होटलमा रकम बुझ्ने गुर्नुहुन्थ्यो।’
किरियापुत्री पनि फरार
अध्यागमन अधिकृत नरवीर खड्का पक्राउ परेपछि यसमा संलग्न अन्य कर्मचारीहरुको संलग्नता पनि खुलेको थियो। जसमध्ये एक जना थिए तत्कालीन अध्यागमन अधिकृत ताराबहादुर कुँवर।
रुकुम पश्चिमको मुसिकोट नगरपालिका–५ घर भएका कुँवर पछिल्लो समय गृहमन्त्रालयको विपत् जोखिम न्यूनीकरण तथा व्यवस्थापन प्राधिकरणको सूचना तथा समन्वय शाखामा कार्यरत थिए। प्रहरी स्रोतका अुनसार उनको संलग्नता खुल्दा उनी बाबुको किरियामा बसेका थिए।
किरियाको काम सकिएपछि पक्राउ गर्ने प्रहरीले बताए पनि उनी त्यसपछि फरार भए। अहिलेसम्म पनि फरार नै छन्। उनीसहित ८ जना अध्यागमनका कर्मचारीलाई फरार प्रतिवादी बनाएर मुद्दा चलाइएको छ। कुँवरले निमा ट्राभल्सबाट मात्रै १२० जनालाई सेटिङमा विदेश पठाएको खुलेको छ। कुँवरको सरुवा भएपछि उनैले चिनजान गराइदिएका नरवीरमार्फत काम हुने गरेको भन्दै पक्राउ परेकाहरुले बयान दिएका छन्।
कुँवरसँगै अध्यागमन अधिकृतहरु कुशल बराल, शैलेन्द्र ढकाल, विमल पौडेल, विष्णु अर्याल, विकास डंगोल, पीताम्बर रिमाल र सुजन फागो फरार छन्।
भिजिट भिसाको सेटिङ मिलाउनकै लागि समिति
भिजिट भिसाको सेटिङ मिलाउनका लागि समिति नै बनाएर काम हुने गरेको पाइएको छ। समिति बनाएर सेन्ट्रल कलेक्सन गरेर रकम बाँडफाँड गर्ने गरेको पाइएको छ। एक जनालाई अवैध तरिकाले भिजिट भिसामा बाहिर पठाए बापत ५० हजार रुपैयाँसम्म अध्यागमनका कर्मचारीहरुले लिने गरेका थिए।
अध्यागमनका शाखा अधिकृत नरवीर खड्काकै संयोजकत्वमा विमानस्थलमा यात्रु सहजीकरण समिति थियो। उक्त कुरा खड्काले समेत स्वीकार गरेका छन्। उनले भनेका छन्, ‘भिजिट भिसामा सेटिङ मिलाउने एजेन्टहरुमार्फत लिने गरेको भनेको ठाउँहरमा लिने गरी उनीहरुले रकम उठाउँथे। उक्त भिसाको लागि सहजीकरणको लागि एउटा समिति बनेको हुन्छ। समितिमा कुशल बराल, शैलेन्द्र ढकाल, बिमल पौडेल, विष्णु अर्याल, विकास डंगोल, पिताम्बर रिमाल, सुजन फागो समेत हुनुहुन्छ।’ नरवीरले नाम लिएका उनीहरु अहिले सबै जना फरार छन्।
‘यात्रु सहजीकरण समितिभन्दा पनि यो त उठ्ती–पुठ्ती समिति जस्तो देखियो। रकम उठाउने र भागबण्डा लगाउने गरेको देखिन्छ,’ भिजिट भिसाको अनुसन्धान गरेका अपराध अनुसन्धान कार्यालयका डीएसपी गोविन्द पन्थीले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752504514.jpg)
-1752390485.png)
-1749826086.png)
