काठमाडौं– विगत ४५ वर्षदेखि अवैध लागुऔषधको बिक्री वितरण गर्दै आएका देवेन्द्रविक्रम रोका छपालीलाई सजाय सुनाइएको छ। काठमाडौं सितापाइलाका छपालीलाई २ वर्ष कैदको सजाय सुनाइएको हो।
पुस १६ गते विशेष अदालतले सम्पत्ति शुद्धीकरण मुद्दामा छपालीलाई दोषी ठहर गरेको थियो। सोही मुद्दाका सहप्रतिवादीहरु छपालीकी श्रीमती चन्द्र भनिने चन्द्रा रोका, गोविन्द कुमार रोका छन्त्याल, नागेन्द्र थापा मगर, मनजित घर्तीमगर, माइला आस्याङ भनिने इन्द्रबहादुर थिङ र जम्बा भोटेलाई भने सफाइ दिइएको थियो।
विशेष अदालतका न्यायाधीशहरु टेकनारायण कुँवर, तेजनारायण सिंह राई र रितेन्द्र थापाको इजलासले छपालीविरुद्ध आज सोमबार सजाय निर्धारण गरेको छ। जसअनुसार उनलाई २ वर्ष कैदका साथै बिगो र जरिवाना पनि सुनाइएको छ।
उनलाई ७४ लाख बिगो सुनाइएको छ भने १ करोड ५ लाख ७२ हजार ५५५ रुपैयाँ जरिवानाको सजाय सुनाइएको छ। त्यसैगरी उनको बैंक खातामा रहेको ६४ लाख ६६ हजार रुपैयाँ जफत गर्नुका साथै घर, गाडीहरुसमेत जफत गर्ने निर्णय भएको विशेष अदालतका प्रवक्ता धनबहादुर कार्कीले जानकारी दिए।
लागुऔषधका मुख्य डिलरको रुपमा चिनिएका देवेन्द्रले विगत ४५ वर्षदेखि लागुऔषधको अवैध व्यापार गरेर अकुत सम्पत्ति कमाएको आरोप लागेको थियो। उनले एक करोडभन्दा बढी अकुत सम्पत्ति कमाएको भन्दै सम्पत्ति शुद्धीकरण विभागले २०७७ असोजमा विशेष अदालतमा मुद्दा दायर गरेको थियो। सोही मुद्दामा उनलाई दोषी ठहर गर्दै सजाय सुनाइको हो।
देवेन्द्रविरुद्ध एक करोड पाँच लाख ७२ हजार पाँच सय ५५ रूपैयाँ बिगो र उनको घरसहितको सम्पत्ति जफतको माग गर्दै मुद्दा दर्ता गरिएको थियो। उनको १३ वटा बैंकमा रहेको ६४ लाख ६६ हजारसमेत जफतको दाबी गरिएको थियो।
विभागले उनकी श्रीमती चन्द्रा रोक्काविरुद्ध पनि सोही बिगो दाबी गरी मुद्दा दायर गरेको थियो। २०६९ सालमा यी सबै जना देवेन्द्रसँगै पक्राउ परेर दोषी ठहर भई जेल भुक्तान गरेर निस्केका थिए।
प्रहरीका अनुसार देवेन्द्र २०३२ सालदेखि नै लागुऔषध कारोबारमा संलग्न हुँदै आएका व्यक्ति हुन्। उनी २०३८, २०४२ र २०६९ सालमा पक्राउ परेकोमा उनी तीनै पटक दोषी ठहर भई जेल बसेका व्यक्ति हुन्। पटक–पटक पक्राउ पर्दै जेल बस्दासमेत उनले आफ्नो धन्दा भने छाडेनन्।
२०६९ सालमा पक्राउ परेका बेला त उनले नेपालबाट भारत हुँदै क्यानडामासमेत चरेश तस्करी गरेको नयाँ तथ्य उजागर भएको थियो। लागुऔषधको अनुसन्धान गर्दा देवेन्द्रको अकुत सम्पत्ति भेटिएपछि अनुसन्धानका लागि भन्दै सम्पत्ति शुद्धीकरण विभागमा पठाइएको थियो।
लागुऔषध बेचेरै उनले काठमाडौंका विभिन्न ठाउँहरुमा घर तथा जग्गा जमिनसमेत खरिद गरेको खुलेको थियो। देवेन्द्रले नेपालका विभिन्न १३ वटा बैंकमा खाता खालेर लागुऔषध बेचेपछि आएको रकम जम्मा गर्ने गरेका थिए भने जापान, हङकङका बैंकमासमेत उनले खाता खोली रकम राखेको भेटिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791087676.png)
-1786602170.png)
