काठमाडौं– स्वर्गीय राजा वीरेन्द्रको ७९ जन्मजयन्तीका अवसरमा आयोजित कार्यक्रममा पूर्व प्रधानमन्त्री लोकेन्द्रबहादुर चन्द, राप्रपा नेपालका अध्यक्ष कमल थापा र राप्रपा निर्देशन समितिका अध्यक्ष डाक्टर प्रकाशचन्द्र लोहनीले एउटै मञ्चमा उभिएर राजा वीरेन्द्रको स्मरण गरेका छन्। उनीबाट देश विकास र प्रजातन्त्र सुदृढीकरणका लागि चालिएका कदमबारे उनीहरुले चर्चा गरे।
राप्रपा नेपालद्वारा आज काठमाडौंमा आयोजित ‘स्व. वीरेन्द्र: एक बहुआयामिक व्यक्तित्व’ विषयक विचार गोष्ठिमा सहभागीले सन्तुलित कूटनीतिकमाध्यमबाट अन्तर्राष्ट्रिय क्षेत्रमा नेपालको छवी प्रवर्द्धनमा उनको भूमिका मत्त्वपूर्ण रहेको चर्चा गरेका छन्।
विस २००२ मा जन्मिएका राजा वीरेन्द्रको २०५८ साल जेठ १९ गते नारायणहिटी राजदरबारमा भएको घटनामा उनीसहित परिवारको वंशनास भएको थियो। नेपालको शाह वंशीय इतिहासमा उक्त घटनालाई रहस्यपूर्ण घटनाकारुपमा हेरिँदै आएको छ।
कार्यक्रममा बोल्दै पूर्व प्रधानमन्त्री लोकेन्द्रबहादुर चन्दले राष्ट्रियताको संरक्षण, प्रजातन्त्रको सुदृढीकरण र विकासको दृष्टिकोणबाट हेर्दा स्वर्गीय राजा वीरेन्द्रको भूमिका र योगदान अतुलनिय रहेको विचार व्यक्त गरे। राष्ट्रिय स्वाभिमानलाई केन्द्रमा राख्ने राजा वीरेन्द्र भएको भन्दै देशभित्रका शक्तिबीचको एकतामा उनको विशेष जोड रहेको बताए।
राप्रपा नेपालका अध्यक्ष कमल थापाले नेपालको राजनीतिक इतिहासमा मुलुकको आधुनिकीकरण र प्रजातन्त्रको जगलाई बलियो बनाउन राजा वीरेन्द्रबाट महत्वपूर्ण योगदान भएको बताए। अध्यक्ष थापाले भने ‘राष्ट्रवादी, विकासप्रेमी र लोकप्रिय राजा वीरेन्द्रबाट अन्तर्राष्ट्रिय समुदायमा नेपालको प्रतिष्ठा अभिवृद्धि गर्न अतुलनीय योगदान भएको छ। पूर्वपश्चिम राजमार्गको पूर्णता, औद्यागिक विकास, अर्थतन्त्र सुदृढीकरण र जिल्ला सदरमुकामा सडक जोड्ने उहाँको सोच र कार्य महत्त्वपूर्ण छ।’
राष्ट्रिय प्रजातन्त्र पार्टीका निर्देशन समितिका अध्यक्ष एवं पूर्वपरराष्ट्रमन्त्री डा प्रकाशचन्द्र लोहनीले देश विकास र सन्तुलित परराष्ट्र नीतिका लागि राजा वीरेन्द्रले देखाएको बाटो अध्ययन गर्न सरकार र राजनीतिक शक्तिलाई सुझाव दिए। लोहनिले भने ‘राजा वीरेन्द्रले मुलुक सानो छ भन्ने मनोभावना कहिलै नबोक्न र विदेशीसँग हुने भेटवार्ता तथा छलफलमा राष्ट्रिय स्वार्थलाई निर्धक्क अघि राख्न निर्देशन हुन्थ्यो। आज त्यो कुराको कमी देखिन्छ।’
कार्यक्रमका राष्ट्रिय योजना आयोगका पुर्ब उपाध्यक्ष रत्नशमसेर राणा र परराष्ट्रबिद डाक्टर निश्चलनाथ पाण्डेले इतिहासको अध्ययन नगरी वर्तमानबारे बुझ्न नसकिने हुँदा राजा वीरेन्द्रबाट भएका कतिपय महत्त्वपूर्ण योगदानबारे आम नेपाली जनताले जान्न र थाहापाउन जरुरी रहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787755124.jpg)
-1786602170.png)
-1786513116.png)
