काठमाडौं– पशुपति क्षेत्र विकास कोषमा कार्यकारी निर्देशकमा नियुक्त लक्ष्मी पुनको योग्यतामाथि सांसदहरुले प्रश्न उठाएका छन्।
संस्कृति, पर्यटन तथा नागरिक उडड्यनमन्त्री सुदन किराँतीले हालै पशुपति क्षेत्र विकास कोषको कार्यकारी निर्देशकमा लक्ष्मी पुनलाई नियुक्त गरेसँगै सांसदहरुले यसको विरोध गरेका हुन्।
बिहीबार अन्तर्राष्ट्रिय सम्बन्ध तथा पर्यटन समितिको बैठकमा बोल्दै सांसदहरुले कार्यकारी निर्देशकमा नियुक्तिका लागि पुनको योग्यतामाथि प्रश्न उठाएका हुन्। सांसदहरुले उनको शैक्षिक योग्यता, अनुभव र धर्म लगायतका विभिन्न विषयहरुमाथि प्रश्न तेर्साएका हुन्।
बैठकमा बोल्दै नेकपा(एमाले)का सांसद एकनाथ ढकालले पुनको नाम समानुपातिक उम्मेदवारको सूचीमा रहेको उल्लेख गर्दै यस्तो व्यक्ति राज्यको कुनै पनि निकायमा नियुक्त हुन नसक्ने बताए। उनले यस्तो विवादित व्यक्तिलाई पशुपति क्षेत्र विकास कोषको कार्यकारी निर्देशक बनाउनु नहुने धारणा राखे।
उनले भने, ‘हाम्रो ऐनमा कुनै पनि व्यक्ति यदी समानुपातिक उम्मेदवार छ भने त्यो कायम रहँदासम्म राज्यको कुनै पनि नियुक्ति हुन नसक्ने प्रावधान छ। निर्वाचन आयोगको वेवसाइटमा हेर्दाखेरी लक्ष्मी पुनको नाम अहिले पनि समानुपातिक उम्मेदवारको रुपमा सूचिकृत भएको देखिन्छ। त्यसले गर्दाखेरी यी कुराहरु के हुन्? हामी सबैको आस्थाको केन्द्र पशुपतिनाथमा हुने कामहरु सकभर कम विवादित हुनुपर्छ भन्ने हामीलाई लाग्छ। यो विषयमा प्रष्ट बनाउनु हुन सदस्यसचिव अथवा मन्त्रालयका सचिवज्युलाई आग्रह गर्दछु।’
ढकालले पशुपति क्षेत्र विकास कोषमा धेरै कर्मचारीहरु नियुक्त गर्ने गरिएको भन्दै कुन कानुन र नियमावलीमा टेकेर कर्मचारी नियुक्त गरिएको हो भनि प्रश्नसमेत गरे। उनले कर्मचारी नियुक्तिको मापदण्डबारे पनि प्रष्ट पारिनुपर्ने बताए।
त्यसैगरी राष्ट्रिय स्वतन्त्र पार्टीका सांसद शिशिर खनालले कार्यकारी निर्देशक नियुक्तिको मापदण्ड पूरा नभएकाले प्रश्न उब्जिएको बताए। उनले कानुन बमोजिम नियुक्ति भए, नभएको सन्दर्भमा सम्बन्धित निकायले प्रष्ट्याउनुपर्ने बताए।
नेपाल मजदुर किसान पार्टीका सांसद प्रेम सुवालले पशुपति क्षेत्र विकास कोषको कार्यकारी निर्देशकमा सत्तारुढ नेकपा(माओवादी केन्द्र)को केन्द्रीय सदस्यलाई नियुक्त गरिएको भन्दै आफ्नो कार्यकर्ता नैतिक रुपले राख्न नमिल्ने बताए। उनले सो नियुक्तिमा योग्यताको समेत ख्याल नगरिएको बताए।
राष्ट्रिय प्रजातन्त्र पार्टीका सांसद धवल समशेर जबराले लक्ष्मी पुन क्रिश्चियन धर्मावलम्वी भएको प्रचार रहेको उल्लेख गर्दै यदी सो कुरा सत्य भएमा राज्यले हिन्दू धर्मावलम्वीहरुप्रति अन्याय र अपराध गरेको ठहर्ने बताए। उनले पुनको धर्म र शैक्षिक योग्यतामाथि छानबिन गर्नुपर्ने माग गरे।
उनले भने, ‘लक्ष्मी पुन क्रिश्चियन धर्मावलम्वी हो भन्ने व्यापक प्रचार छ। यो विषय गम्भिर छ। उहाँ क्रिश्चियन हुनुहुन्छ भने अनर्थ गरेको हो। हाम्रो विश्वासमाथि कुठाराघात गरेको हो। हिन्दूको आस्थाको केन्द्रमा अर्को धर्मावलम्वी हुनु हुँदैन। छानबिन हुनुपर्यो। उहाँ क्रिश्चियन हुनुहुन्छ भने घोर अन्याय र अपराध गरेको राज्यले ठहर्छ। हिन्दू नै हो भने मलाई भन्नु केही छैन। योग्यता छानबिन गर्नुपरो। सर्टिफिकेट हुनुपर्यो। निर्देशिकामा मापदण्ड पूरा गर्नुहुन्छ भने ठिकै छ।’
नेकपा(माओवादी केन्द्र)की सांसद छिरिङ ल्हामु लामा (तामाङ)ले पशुपति क्षेत्र विकास कोषको कार्यकारी निर्देशकमा नियुक्त लक्ष्मी पुनमाथिको आक्रमण महिला, जनजाति र कर्णाली भेगमाथि भएको प्रहार भएको बताइन्। पुनको योग्यतामाथि प्रश्न उठाएर दुर्व्यवहार र अपमान गरिएको भन्दै आपत्ति प्रकट गरिन्।
उनले पुन क्रिश्चियन धर्मावलम्वी भएको प्रचार गरिएको भन्दै यसको विरोध गरिन्। पुन हिन्दू धर्मावलम्वी भएको उनको दाबी छ।
पशुपति क्षेत्र विकास कोषका सदस्यसचिव राजुकुमार खत्रीले पुनको शैक्षिक योग्यता स्नातकोत्तर उत्तीर्ण रहेको जानकारी गराए। १५ वर्षे अनुभव भने विभिन्न मिडिया, एफएमहरुमा काम गरेको देखिएको उनको भनाइ छ।
उनले भने, ‘शिक्षणसंस्थाबाट कुनै विषयमा स्नात्तकोत्तर तह उत्तीर्ण गरी कोष सेवा वा सरकारी सेवामा प्रचलित कानुन बमोजिम दर्ता भएको संगठित संस्था वा अन्तर्राष्ट्रिय संघ, संस्थाको कम्तिमा अधिकृत द्वितिय श्रेणीसरहको पदमा कम्तिमा १५ वर्षको अनुभव भनेको एउटा छ। अर्को, मान्यताप्राप्त शिक्षण संस्थाबाट कुनै विषयमा स्नातक तह उत्तिर्ण गरी कोषको सेवा, सरकारी सेवा वा प्रचलित कानून बमोजिम दर्ता भएको संगठित संस्था वा अन्तर्राष्ट्रिय संस्थामा अधिकृत पदमा कम्तिमा २० वर्ष सेवा गरिएको भनिएको छ। उहाँको योग्यताको हकमा उहाँले मदन भण्डारी कलेजबाट डिग्री उत्तिर्ण गर्नुभएको छ। गोवा विश्वविद्यालयबाट ब्याचलर सकिएको छ। योग्यता अन्य १५ वर्षको कुरामा चाहीँ उहाँले विभिन्न मिडिया, एफएमदेखि लिएर विभिन्न मिडियामा उहाँले कार्य गर्नुभएको योग्यता बुझाउनुभएको छ।’
सांसदहरुले पशुपति क्षेत्र विकास कोषका अन्य विभिन्न गतिविधिहरुमा पनि प्रश्न उठाएका थिए।
तीन दिनभित्र नियुक्तिको कागजात पेस बुझाउन निर्देशन
समितिले पुनको कार्यकारी निर्देशकको नियुक्ति सम्बन्धी प्रमाणित कागजातहरु ३ दिनभित्र समितिमा बुझाउन निर्देशन दिएको छ।
कोषको कार्यकारी निर्देशक नियुक्ति सम्बन्धी प्रमाणित कागजातहरु ३ दिनभित्र बुझाउन संस्कृति, पर्यटन तथा नागरिक उडड्यन मन्त्रालय र पशुपति क्षेत्र विकास कोषलाई निर्देशन दिएको हो। केही दिनअघि पशुपति क्षेत्र विकास कोषको कार्यकारी निर्देशकमा लक्ष्मी पुनलाई नियुक्ति गरिएको थियो। सो नियुक्ति प्रक्रिया र सम्बन्धित व्यक्तिको योग्यतामाथि सांसदहरुले प्रश्न उठाएसँगै समितिले नियुक्ति सम्बन्धी प्रमाणित कागजात मगाएको हो।
बैठकले कार्यकारी निर्देशक नियुक्ति गर्ने निर्णयको माइन्यूट, निजको शैक्षिक योग्यता र अनुभवको प्रमाणपत्र वैयक्तिक विवरणसहितको प्रमाणित कागजात तिन दिनभित्र समितिमा उपलब्ध गराउन निर्देशन दिएको छ। त्यसैगरी बैठकले पशुपति क्षेत्र विकास कोषको नाममा रहेको जग्गा शिघ्र एकिन गरी हाल साविक गरी कोषको नाममा लालपुर्जा लिने व्यवस्था गर्न पनि निर्देशन दिएको छ।
समितिले पशुपति क्षेत्र विकास कोषले आनन्द होटलसँग गरेको सम्झौताको सक्कल सहितको विवरण ३ दिनभित्र उपलब्ध गराउन पनि निर्देशन दिएको छ।
यस्तै बैठकले पशुपति क्षेत्र विकास कोषको नाममा रहेको जग्गा शीघ्र एकिन गरी हाल साबिक गरी कोषको नाममा लालपूर्जा लिने व्यवस्था गर्न निर्देशन दिने निर्णय पनि गरेको छ।
पशुपति क्षेत्र विकास कोषले आनन्द होटलसँग गरेको सम्झौताको सक्कल सहितको विवरण ३ दिनभित्र उपलब्ध गराइदिनका लागि निर्देशन दिने निर्णय गर्नुका साथै कोषको गुरुयोजना उपलब्ध गराउन पनि निर्देशन दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
