धनगढी– चिकित्सा सुधारका लागि प्रा डा गोविन्द केसीले शुक्रबारदेखि धनगढीमा अनसन सुरु गरेका छन्। अनसन सुरु गरेको दोस्रो दिनमै उनको अनसनमा समर्थनभन्दा विरोध सुरु भयो।
विगतमा उनका मागलाई सम्बोधन गर्नुपर्ने भन्दै अनसनमा समर्थन गर्दै आएका सुदूरपश्चिमबासीहरुबाट यस वर्ष सहयोग न्यून रहेको छ। डाक्टर केसीको मागको अपव्याख्या गर्दै केही समूहहरुले विरोध जनाएका हुन्।
शुक्रबार केसी गेटा मेडिकल कलेजमा अनसन बस्न जाने तयारी हुँदा गेटा मेडिकल कलेज स्थापनार्थ संघर्ष समितिले प्रवेशमा रोक लगायो। संघर्ष समितिका संयोजक लोकराज पाण्डेले गेटा मेडिकल कलेजको थुप्रै काम अघि बढेको भन्दै डाक्टर केसीले सो कार्य अघि बढ्न नदिने गरि सत्याग्रहमा आएको आरोप लगाए।
समितिले शनिबार धनगढीमा पत्रकार सम्मेलन आयोजना गर्दै गेटामा ६ सय शय्याको अस्पतालसहित विश्वविद्यालय निर्माण गर्नुपर्ने प्रदेशबासीको माग विपरीत केसीले स्वास्थ्य प्रतिष्ठानको मुद्दा उठाएकाले अनसन बस्न नदिएको उनको भनाइ छ। संघर्ष समितिका सह–संयोजक भट्टले डाक्टर केसी प्रदेशबासीको भावना र संघर्ष समितिको आन्दोलनको मर्म विपरीत आएकाले अनसन बस्न नदिएको बताए।
यद्यपि, डाक्टर केसीले गेटा मेडिकल कलेज यथाशिघ्र सहमति अनुरुप सञ्चालनमा ल्याउन भन्दै सत्याग्रह सुरु गरेका हुन्। उनले भने, ‘गेटा मेडिकल कलेज विश्वविद्यालय बनोस् वा प्रतिष्ठान बनोस तर, सहमति अनुसार छिटोभन्दा छिटो सञ्चालनमा ल्याइयोस्।’
शनिबार नै धनगढीको पार्कमोडमा चिकित्सा शिक्षा सरोकार संघर्ष समितिले धनगढीको पार्कमोडमा डाक्टर केसीविरुद्ध नाराबाजीसहित प्रदर्शन गरे। उनीहरुको भनाइ थियो, ‘डाक्टर केसीका कारण यहाँ नर्सिङ पढ्न पाएनौं।’
चिकित्सा शिक्षा ऐन २०७५ को मापदण्ड अनुसार कलेज सञ्चालनका लागि एक सय शय्याको आफ्नै अस्पताल हुनपर्ने प्रावधानलाई कडाईका साथ लागू गर्नुपर्ने उनको माग थियो। यही मागका कारण यहाँ एक सय शय्या अस्पताल नभएका कलेजहरुमा नर्सिङ कक्षामा रोक लगाइएको थियो।
डाक्टर केसी भन्छन्, ‘चिकित्सा सुधारका थुप्रै मापदण्ड छन्। मापदण्ड नै पालना नगर्ने कलेज तथा अस्पतालहरुले कसरी योग्य जनशक्ति उत्पादन गर्छन्।’ उनले आफ्नो माग आम नागरिकको हितमा रहेको बताउँदै भने, ‘कुनै शीर्ष नेताको दबाबमा उठाइएका आवाजको पछि लागेर म सत्याग्रह तोड्दैन।’
‘म प्रोफेसर हुँ। डाक्टर हुँ। प्रतिष्ठान के हो, विश्वविद्यालय के हो भन्ने मलाई थाहा छ। आर्थिक मन्दी छ भने विश्वविद्यालय बनाउन त बेसी पैसा चाहिन्छ नि। मेरो आन्दोलन कसैले रोक्न खोजेर रोकिन्न’, उनले भने, ‘देउवाजीले रोक्न खोजे। प्रचण्डले कोसिस गरे। ओलीले रोक्न खोजे। नेताहरुले रोक्न खोजेर मेरो आन्दोलन रोकिन्न। म लड्न रोकिनेवाला छैन।’
डाक्टर केसीले सशस्त्र द्वन्द्वकालमा भएका जघन्य तथा मानवताविरोधी अपराधका दोषीहरुलाई दण्डित गर्दै मृतक, घाइते र बेपत्ताका परिवारलाई न्याय हुने गरी संक्रमणकालीन न्याय शीघ्र टुंगोमा पुर्याउनुपर्ने माग पनि अघि सारेका छन्। डाक्टर केसीले विगतमा भएका सम्झौता, सरकारी अस्पतालमा मागअनुसार दरबन्दी थप गर्दै क्षमता बढाउने र सबै निःशुल्क औषधि पाइने सुनिश्चित गर्ने माग राखेका छन्।
चिकित्सा शिक्षा ऐनमा उल्लेख भएअनुसार सबै प्रदेशमा कम्तीमा एउटा सरकारी मेडिकल कलेज पुर्याउने, जनसंख्या र भौगोलिक अवस्थितिअनुसार यस अगाडि सम्झौता भएबमोजिम इलाम, उदयपुर, डडेलधुरामा सरकारी मेडिकल कलेज खोल्ने माग अगाडि सारेका छन्।
सय शय्याभन्दा बढी क्षमता भएका सरकारी अस्पतालमा नर्सिङलगायत अन्य स्वास्थ्यसम्बन्धी विषयका कार्यक्रम सुरु गरिनुपर्ने, विश्वविद्यालय र प्रतिष्ठानहरुमा पदाधिकारी नियुक्तिको मापदण्डसहित कानुनी व्यवस्था गर्नुपर्ने, ऐन जारी नहुँदासम्म दलीय भागबन्डा निषेध गर्दै यसअगाडिका सम्झौताबमोजिम मापदण्डअनुसार तुरुन्त विश्वविद्यालयमा नियुक्ति गर्ने र एकीकृत प्रतिष्ठान ऐन शीघ्र जारी गर्ने माग केसीले राखेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
