बालकृष्ण खाणको मुद्दामा सुनुवाइ हुँदै, छुट्लान कि थुनामै रहलान्?

राजनीति

नेपाल लाइभ बिहीबार, मंसिर २८, २०८० १०:३३

काठमाडौं– पूर्व गृहमन्त्री एवम् नेपाली कांग्रेसका नेता बालकृष्ण खाणको नक्कली भुटानी शरणार्थी प्रकरणको मुद्दामाथि आज (बिहीबार) उच्च अदालत पाटनमा सुनुवाइ हुँदै छ। उच्च अदालतको एकल न्यायाधीशको इजलासले खाणको मुद्दामा सुनुवाइ गर्नेछ।

पुर्पक्षका लागि थुनामा पठाउने काठमाडौं जिल्ला अदालतको आदेशविरुद्ध दायर पुनरावलोकन निवेदनको फैसलामा २ जना न्यायाधीशहरुको मत बाझिएपछि खाणको मुद्दा एकल न्यायाधीशको इजलासमा पेस गरिएको हो।

नक्कली भुटानी शरणार्थी प्रकरणका अन्य अभियुक्तको हकमा उच्च अदालत पाटनका २ जना न्यायाधीश जनक पाण्डे र प्रकाश खरेलको संयुक्त इजलासले मंसिर १५ गते सर्वसम्मत तरिकाले फैसला सुनाए पनि खाणलाई थुनामुक्त गर्ने वा पुर्पक्षका थुनामै राख्ने भन्नेबारे मत बाझिएको थियो। दुई न्यायाधीशबीच राय बाझिएकाले तेस्रो न्यायाधीशकोमा मुद्दा पेस भएको हो।

खाणको मुद्दा कुन न्यायाधीशको इजलासमा सुनुवाइ हुन्छ भन्ने कुरा केही समयपछि गोलाबाट टुंगो लाग्ने छ। बिहीबार सुनुवाइ गर्ने न्यायाधीशले यसअघिका २ मध्ये जुन न्यायाधीशको रायलाई समर्थन गर्छन्, त्यही आदेश कार्यान्वयन हुनेछ। धरौटीमा रिहा गर्नेमा सर्मथन गरे खाण रिहा हुनेछन् भने थुनामै राख्नेमा सहमत भएमा थुनामै रहन्छन्। यदि बिहीबार सुनुवाइ गर्ने न्यायाधीशले अघिका दुई बाहेक तेस्रो राय दिएमा पुनरावलोकन निवेदन सुनुवाइका लागि सर्वोच्च अदालतको एकल इजलासमा पुग्नेछ।

नक्कली भुटानी शरणार्थी बनाएर अमेरिका पठाइदिने भन्दै नेपाली नागरिकबाट करोडौं ठगी गरेको प्रकरणमा खाणसहित पूर्व उपप्रधानमन्त्री एवम् नेकपा एमालेका नेता टोपबहादुर रायमाझी, बहालवाला सचिव टेकनारायण पाण्डेसहितको संलग्नता बाहिरिएको थियो।

उक्त प्रकरणमा काठमाडौं जिल्ला अदालतले असार १ गते थुनछेक आदेश जारी गर्दै खाणसहितका प्रतिवादीलाई पुर्पक्षका लागि थुनामा पठाउने निर्णय सुनाएको थियो। जिल्ला अदालतको थुनछेक आदेशविरुद्ध खाणसहितका प्रतिवादीहरुले उच्च अदालत पाटनमा पुनरावलोकन निवेदन दिएका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

फागुन ५ मा प्रधानमन्त्री ओलीले लुम्बिनी प्रदेशसभा बैठकमा सम्बोधन गर्ने

फेसबुकमा नकारात्मक कमेन्ट र शेयर नगर्न कार्यकर्तालाई परराष्ट्रमन्त्री राणाको अनुरोध

चलचित्रसम्बन्धी अध्ययनका लागि छात्रवृत्ति