पाटन/बैतडी– एउटा मोटरेबल पुल निर्माण गर्ने कति समय लाग्ला? २ वा ३ वर्ष बढीमा। तर बैतडीमा एउटा यस्तो पुल छ, जसका लागि हरेक वर्ष बजेट भुक्तानी हुन्छ तर पुल निर्माण कार्य भने सम्पन्न हुँदैन। सडक डिभिजन कार्यालय बैतडीले निर्माण गरिरहेको त्रिपुरेश्वरमा निर्माणधीन मोटरेबलमा करोडौं खर्च गरेको छ तर पुल अधुरै छ।
जिल्लाको पाटन–लोर्खा–सकार–कैलपाल सडकखण्ड अन्तर्गत सुर्नयागाडको त्रिपुरेश्वरमाा निर्माणधीन मोटरेबल पुल १० वर्षदेखि अलपत्र छ। कहिले स्थानीयको अवरोधको बहाना त कहिले बजेट अभाव भन्दै निर्माण व्यवसायीले काम लत्याउँदै आएका छन्।
प्रत्येक वर्ष असारमा रनिङ बिल भुक्तानीका लागि अली–अली काम हुने गरेको थियो भने पछिल्लो करिब १ वर्षबाट काम पूर्णरुपमा ठप्प छ। जेठ अन्तिमतिर ५८ प्रतिशत भौतिक प्रगति भइसकेको सरकारी निकायको तथ्यांकमा भनिएको पुलका भौतिक संरचनाहरु असारको वर्षाले बगाएको थियो।
‘यसवर्ष त बनेर सञ्चालनमा आउँछ’ भन्ने जवाफ दिन थालेको वर्षौं भइसकेको स्थानीय प्रकाश भट्टराई बताउँछन्। ‘१० वर्ष भयो– अब बन्छ, अब बन्छ, अब त यही वर्षभित्रै बन्छ भन्ने उत्तर आउँछ। तर सडक डिभिजन र निर्माण व्यवसायीले कहिल्यै काम सम्पन्न गर्दैनन्’, उनले भने।
आर्थिक वर्ष २०७१ भदौ १५ बाट निर्माण कार्य सुरु गरेर ३ वर्षभित्र निर्माण सम्पन्नको लक्ष्य राखिएको सो पुलको निर्माण कार्यले अहिलेसम्म पूरा भएको छैन। निर्माण व्यवसायीलगायत अन्य प्राविधिक कारणहरुले ढिलाई भएको स्वीकार गर्दै सडक डिभिजन बैतडीले गत आर्थिक वर्षको असारभित्र पुल निर्माणले पूर्णता पाउने दाबी गरे पनि काम भने हुन सकेन।
यो वर्ष पनि काम छिटो सम्पन्न गर्ने ताकेता पत्र दिइएको सडक डिभिजन बैतडीका डिभिजन प्रमुख कुन्दप्रसाद लामिछानेले बताए। ‘ठेकेदारलाई ताकेता पत्र पठाएका छौं। यो वर्ष नसकिए ठेक्का रद्द हुन्छ,’ उनले भने, ‘यो पुलले हाम्रो कार्यालयको पनि सन्देश राम्रो छैन अब दुईमध्ये एउटा काम हुन्छ।’
निर्माणको जिम्मा पाएको कम्पनीले भने पाँचपटक म्याद थप गर्दा पनि निर्माण गर्न नसकेको हो। २०७१ भदौ १५ गते पुल निर्माणका लागि सम्झौता भए पनि ३२ महिनाभित्र मोटरेबल पुल बन्ने ठाउँमा जाने बाटोको विवाद, एक वर्ष संघ र प्रदेशमध्ये कसले हेर्ने भन्ने अन्योलतालगायतका मुआम्बजा विवादहरुले पुल निर्माणमा ढिलाई भएको निर्माण कम्पनीको भनाइ छ।
बालुवा–गिट्टी ढुवानीको काम सुरु भएकाले अब यो वर्ष निर्माण सम्पन्न गर्ने निर्माण कम्पनीका प्रतिनिधि तथा सुदूरपश्चिम निर्माण व्यवसायी संघका उपाध्यक्ष मदन मोहन बिष्टले बताए।
-1702458841.jpg?timestamp=1702458842473)
पुल नहुँदा वर्षातको मौसममा पाटन नगरपालिका तथा स्थानीय बजारमा आवाजजावत गर्न र खाद्यन्नका सामान ढुवानीका लागी घन्टौं पैदल हिँड्नुपर्ने बाध्यता रहेको छ। सडक सञ्जाल विस्तार भए पनि पुल नभएकै कारण आफूहरुले गाडी चढ्न नपाएको स्थानीय कृष्ण बोहराले बताए।
पाटनदेखि वाड नं १ को सकार र वडा नम्बर ७ कैलपालसम्म सडक सञ्जाल विस्तार भएको छ। तर पुल नभएकै कारण वर्खामा आफूहरुले सवारी सुविधा लिन नपाएको बोहोराको गुनासो छ। निर्माण कम्पनी र सरकारका कारण सास्ती भोग्नु परेको स्थानीय राम भट्टराई बताउँछन्। हेलो सरकारमासमेत गुनोसो पटक पटक रेकर्ड गरे पनि सम्बोधन नभएको वडा नम्बर १ का वडा अध्यक्ष तर्क सिंह ठगुन्नाले बताए।
२ करोड ९३ लाख ६७ हजार ८ सय ५५ रुपैयाँको लागतमा निर्माण भइरहेको पुल अझै सम्पन्न नहुँदा निर्माण कम्पनीका ठेकेदार र सडक डिभिजनको अहिले आलोचना भइरहेको छ। निर्माण कार्य प्रारम्भ गरेको लामो समयसम्म पुल निर्माण नहुँदा स्थानीय नागरिकहरु पनि आक्रोशित बनेका छन्।
सुर्नया नदीमा मोटेरेबल पुल समयमा निर्माण नहुँदा नदीमा अस्थायी बाटो बनाउन बर्सेनि लाखौं रकम खर्च भइरहेको छ। पछिल्लो ७ महिनामै दुई पटक सडक डिभिजन कार्यालयले अस्थायी बाटोका लागि कोटेशनमार्फत लाखौं खर्च गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
