राष्ट्रिय सभा निर्वाचन कार्यतालिका सार्वजनिक

राजनीति

नेपाल लाइभ शुक्रबार, मंसिर १५, २०८० १४:१३

काठमाडौं- निर्वाचन आयोगले माघ ११ गते हुने राष्ट्रिय सभा निर्वाचनको कार्यतलिका सार्वजनिक गरेको छ। नेपाल सरकारले माघ ११ गतेका लागि राष्ट्रिय सभा सदस्यको निर्वाचन गर्ने निर्णय गरेको थियो।

सो निर्णयपछि आयोगले कार्यतलिका सार्वजनिक गरेको हो। आयोगले शुक्रबार एक विज्ञप्ति जारी गर्दै कार्यतालिकाबारे जानकारी दिएको हो।

‘स्वीकृत कार्यतालिका अनुसार यही मंसिर २२ गते निर्वाचनमा भाग लिने राजनीतिक दल दर्ताका लागि सूचना प्रकाशन भई मंसिर २४ गतेदेखि २९ गतेसम्म राजनीतिक दल दर्ता हुने कार्यक्रम रहेको छ,’ आयोगले उल्लेख गरेको छ।

त्यस्तै, राजनीतिक दल दर्ता भएपश्चात पुस १ गते राजनीतिक दललाई निर्वाचन चिह्न प्रदान गरी पुस ४ गते स्वीकृत दलको नामावली नेपाल राजपत्रमा प्रकाशनार्थ पठाइने पनि जनाएको छ।

स्वीकृत कार्यतालिका अनुसार पुस १६ गते निर्वाचन अधिकृतको नियुक्ति र सोही दिन सात वटै प्रदेश निर्वाचन कार्यालयमा निर्वाचन अधिकृतको कार्यालय स्थापना गर्ने कार्यक्रम रहेको छ। पुस २० गतेदेखि २९ गतेसम्म निर्वाचन अधिकृतको कार्यालयमा निर्वाचन कार्यक्रम सञ्चालन हुने पनि आयोगले आफ्नो कार्यतालिकामा राखेको छ।

निर्वाचनको मिति माघ ११ गते बिहान ९ बजेदेखि अपराह्न ३ बजेसम्म मतदानको कार्य सञ्चालन गर्ने आयोगले तयारी गरेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

निवर्तमान गभर्नर अधिकारीविरुद्ध सर्वोच्चमा रिट

प्रदेश सरकारहरूको ९ महिनाको खर्च ८५ अर्ब ४७ करोड

सगरमाथा संवादका लागि भारत सरकारबाट सवारीसाधन सहयोग