डडेलधुराबाट ओलीको चेतावनी– चिहान खनेर राजतन्त्रको भुत प्रेत ल्याउने सपना नदेखे हुन्छ

राजनीति

नेपाल लाइभ शुक्रबार, मंसिर १५, २०८० १२:५४

अमरगढी– नेकपा एमालेका अध्यक्ष केपी शर्मा ओलीले समाप्त भइसकेको राजतन्त्र पुन: फिर्ता ल्याउने भन्ने सपना नदेख्न चेतावनी दिएका छन्।

मध्यपहाडी क्षेत्र केन्द्रित पार्टीको संकल्प यात्राको दोस्रो दिन डडेलधुराको अमरगढीमा आयोजित सभामा बोल्दै ओलीले चिहान खनेर राजतन्त्रको भुत–प्रेत ल्याउने सपना नदेख्न भनेका हुन्। अध्यक्ष ओलीले अहिले पनि नेपालमा हिंसा र अस्थिरता मच्चाउन खोज्ने तत्वहरु सक्रिय भएको दाबी गरे।

नेपालमा अस्थिरता मच्चाउन खोज्नेहरुले आतंककारी कार्य गरेको पनि ओलीले टिप्पणी गरे।

कांग्रेस सभापति शेरबहादुर देउवाको गृहजिल्लाको सभामा देउवाले सत्ता गठबन्धन र कांग्रेसको अहिले भूमिकाप्रति पनि कटाक्ष गरे। सत्ता गठबन्धनका नेताहरु अहिले सत्ता कसरी जोगाउने अनि कसरी मन्त्री हुनुका साथै कसरी बढी कमाउने भन्ने धन्दामा लागेको ओलीले आरोप लगाए।

पूर्वप्रधानमन्त्री समेत रहेका ओलीले अर्थतन्त्र ओरालो लागेको र कर्मचारीलाई तलब खुवाउन समेत आन्तरिक ऋण उठाउनुपर्ने अवस्था भएको दाबी गरे। उनले महाकाली र सेती करिडोर पनि अवरोध भएको दाबी गरे। उनले ठेक्का पट्टा नै रद्द र स्थगित भएको दाबी गरे।

पुष्पकमल दाहाल प्रचण्ड नेतृत्वको वर्तमान सरकार छेस्कोको भरमा अडेको दाबी गर्दै कुनै पनि बेला ढल्नसक्ने ओलीको दाबी छ।

अध्यक्ष ओलीले कांग्रेस प्रचण्ड पथमा लागेको भन्दै आलोचना गरे। उनले कांग्रेस अहिले प्रचण्ड पथको भरिया बनेको टिप्पणी गरे।

उनले नेपाली कांग्रेसका मान्छेलाई मुद्दा लागेको भन्दै हो हैन भनेर अदालतले भन्ने बताए। तर सत्तामा रहेकै समयमा मुद्दा लागेको ओलीले टिप्पणी गरे।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

साउदी अरबमा भएको सडक दुर्घटनामा तीन नेपालीको मुत्यृ

राष्ट्रिय सभाको बैठक बस्दै

आजको मौसमः तराईमा हुस्सु र कुहिरो, पहाडमा सामान्यतया सफा रहने