ओली भन्छन्– हामी फेरि रैती हुन सक्दैनौँ

राजनीति

नेपाल लाइभ बिहीबार, मंसिर १४, २०८० १५:०९

बैतडी– नेकपा एमालेका अध्यक्ष केपी शर्मा ओलीले मौजुदा व्यवस्था (गणतन्त्र)को विरोध गर्ने दुस्साहसीहरु देखा परेको टिप्पणी गरेका छन्। पार्टीले सुरु गरेको झुलाघाट–चिवाभञ्ज्याङ संकल्प यात्राको उद्‌घाटनका लागि बैतडी पुगेका ओलीले जनता फेरि रैती नहुने टिप्पणी गरे।

‘उहिले राजतन्त्र थियो। त्यो राजतन्त्रको अहिले सालिक बनाएर तमसा गर्ने असंवैधानिक काम भइरहेको छ। गणतन्त्रको विरोध गर्ने दुस्साहसी काम भइरहेको छ। लोकतन्त्रको विरोध गर्ने दुस्साहसी काम भइरहेको छ,’ ओलीले भने, ‘तसर्थ, म भन्न चाहान्छु। हामी पछाडि फर्किन सक्दैनौँ। फेरि हामी रैती हुन सक्दैनौँ।’

अध्यक्ष ओलीले आफ्नो पार्टीले ‘समृद्ध नेपाल र सुखी नेपाली’को नारालाई वास्तविकतामा परिणत गर्ने दाबी गरे। ‘समृद्ध नेपाल, सुखी नेपाली बनाउने काममा एमालेले कुनै कसर बाँकी राख्दैन। संकल्प यात्राले पहिलो प्राथमिकता राख्छ,’ ओलीले भने।

अध्यक्ष ओलीले सङ्कल्प यात्रामा जनतासँग संवाद र समस्याहरुको अध्ययनको काम गरिने बताए। उनले भने, ‘मध्यपहाडी लोकमार्गको विकास कसरी गर्न सकिन्छ, युवालाई उद्योगसँग जोड्न सकिन्छ, स्वदेशमै युवा टिकाउने, गुणस्तरीय स्वास्थ्य, शिक्षा लगायतका विषयमा पनि संकल्प यात्राले मद्दत पुग्छ।’

एमालेले सुरुवात गरेको चुच्चे नक्सा सार्वजनिक, तुइन विस्थापित लगायतका काम अहिलेको सरकारले पाखा लगाएको ओलीको भनाइ छ। ओलीले भने, ‘झुलाघाटमा पुलको बिषय खै सरकार? तुइन विस्तापित हामीले गरेका छौँ, गठबन्धन भनेको सरकार के गर्दैछ?’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

सपथ लिनुअघि ट्रम्पले ल्याए आफ्नै क्रिप्टोकरेन्सी

मदन भण्डारी राजमार्गको पूर्वी खण्डमा ४२ किलोमिटर सडक कालोपत्र, कँहा कँहा कति भइसक्यो ?

एमालेमा फर्किँदै बामदेव गौतम