काठमाडौं– प्रधानमन्त्री पुष्पकमल दाहाल प्रचण्डले देशका सबै राजनीतिक दलको सहमतिपछि सर्ट टर्म भिडियो होस्टिङ सञ्जाल टिकटकमाथि प्रतिबन्ध लगाउने निर्णय भएको बताएका छन्।
समाजमा विसंगति, विकृति, अराजकता फैल्याउने र राज्यलाई जिम्मेवारीबाट अगाडि बढ्न रोक्ने खालका प्रवृत्तिलाई के गरी रोक्ने भन्ने विषयमा लामो छलफलपछि टिकटकमाथि प्रतिबन्ध लगाउने निर्णय भएको उनको भनाइ छ।
नेपाल संवत् ११४४ को अवसरमा काठमाडौंको बसन्तुपरमा आयोजित शुभकामना आदान प्रदान कार्यक्रममा बोल्दै प्रधानमन्त्री प्रचण्डले सामाजिक सद्भाव, पारिवारिक एकतालाई खलबल पार्नबाट बचाउने उद्देश्यले टिकटक बन्द गर्ने निर्णय भएको दाबी गरे।
प्रधानमन्त्री प्रचण्डले भने– समाजमा विसंगति, विकृति, अराजकता फैल्याउने र राज्यलाई जिम्मेवारीबाट अगाडि बढ्न रोक्ने खालका प्रवृत्तिलाई के गरी रोक्ने भन्ने विषयमा लामो छलफल पछि, देश भित्रका सबै राजनीतिक दल के सत्ता पक्ष, के प्रतिपक्ष, प्रमुख प्रतिपक्षी समेत सबैको लामो बहसको सहमतिपछि र अन्तर्राष्ट्रिय स्तरमा पनि सबैभन्दा लोकतान्त्रिक र विकसित देशहरुले कस्तो मान्यता अपनाएका छन् भन्ने कुराको पनि अध्ययन गरेर सामाजिक सद्भाव, पारिवारिक एकतालाई खलबल पार्नबाट बचाउने उद्देश्यले गरेको कुरा म जानकारी गराउन चाहन्छु।’
टिकटक बन्द गर्ने निर्णयप्रति केहीले चित्त दुखाएको उल्लेख गर्दै प्रधानमन्त्री प्रचण्डले त्यसबारे बहस हुँदै जाने उल्लेख गरे। ‘बहस त हुँदै जाला। त्यसमा मत विमति पनि होलान्। तर सरकारको उद्देश्य, कम्तीमा पनि म प्रधानमन्त्रीको हैसियतले नेपाली समाजमा विसंगति, विकृति, अराजकता फैल्याउने प्रवृत्तिलाई रोकेर जानुपर्छ। नियमन गर्नुपर्छ। रोक्न मिल्नेलाई रोक्नुपर्छ। नियमन गर्नुपर्नेलाई नियमन गर्नुपर्छ भन्ने मान्यताबाट उत्प्रेरित भएर। सबैको सहमतिबाट गरेको छु। केही साथीहरुको चित्त बुझेको छैन। छलफल हुँदै जाला,’ प्रधानमन्त्री प्रचण्डले भने।
सोमबार बसेको मन्त्रिपरिषद्को बैठकले टिकटकमाथि प्रतिबन्ध लगाउने निर्णय गरेको हो। सरकारले टिकटकलाई बन्द गर्ने निर्णय लिनुको पछाडि यसबाट सामाजिक सद्भाव विथोलिने गरेको कारण प्रस्तुत गरेको छ। ‘हाम्रो पारिवारिक संरचना, हाम्रो सामाजिक सम्बन्धलाई खलबल्याउने गरी लगातार प्रचारप्रसार भइरहेका छन्,’ सरकारकी प्रवक्ता रेखा शर्माले निर्णयबारे जानकारी दिँदै भनेकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
