जनकपुरधाम– मधेश प्रदेश सरकारले प्रहरी समायोजन गर्नका लागि संघीय सरकारलाई ३० दिनको समय सीमा दिएको छ।
बुधबार मधेश प्रदेश सरकारका मुख्यमन्त्री सरोजकुमार यादवले जनकपुरधाममा पत्रकार सम्मेलन गर्दै ३० दिनभित्र प्रहरी समायोजन गर्न माग राखी प्रधानमन्त्रीलाई ज्ञापन पत्र बुझाउन लागिएको जानकारी दिए।
उनले भोलि (बिहीबार) प्रहरी समायोजन र निजामती कर्मचारी समायोजनको माग गर्दै प्रधानमन्त्रीलाई ज्ञापन पत्र बुझाइने बताए।
उनले प्रहरी प्रशासन प्रदेश सरकार मातहतमा नआउँदा काम गर्न अप्ठ्यारो परेको उल्लेख गरे। संघीय सरकारलाई प्रहरी समायोजन गर्नका लागि ३० दिनको समय सीमा दिइने र सो समयमा पनि समायोजन नभएमा चरणवद्ध आन्दोलन गर्ने उनले चेतावनी दिए।
उनले भने, ‘संघीय सरकारले प्रदेश सरकारलाई कानून बनाउनबाट जुन वञ्चित गरेको छ। अधिकार दिएको छैन। त्यसको निम्ति हामी भोलि प्रधानमन्त्रीज्यु कहाँ साढे १० बजे ज्ञापन पत्र बुझाउँदै छौं। प्रहरी प्रशासन अहिलेसम्म हाम्रो मातहतमा आएको छैन। जबकी संघले पनि प्रहरी ऐन बनाइसकेको छ तर कार्यान्वयनमा आएको छैन। यस्तै निजामती ऐन लगायतका धेरै विषयहरु छन्। प्रदेशलाई हस्तान्तरण गरिएको छैन। जुन कारणले प्रदेश सरकारलाई काम गर्न अप्ठ्यारो छ। दबाब दिनको लागि ज्ञापन पत्र बुझाउँछौं। ३० दिनको समय दिएर। ३० दिनभित्र कार्यान्वयन पक्षमा केन्द्र सरकार गएन भने हामी चरणवद्ध आन्दोलनतिर लाग्छौं।’
उनले प्रहरी र कर्मचारी समायोजनका साथसाथै ज्ञापन पत्रमा अन्य विभिन्न मागहरु पनि समेटिएको उल्लेख गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1750773429.png)
-1749826086.png)
